Main Menu

PURẠUTE CANDO GAHNA

Sãi bo̠cho̠r (2001 kho̠n 2100) reaḱ jo̠to̠ kho̠n ạḍi ghạṛić utạr cando gahna sạrdiḱkana tehen̕ ńindạ sokolbar . Noa do̠ niạ serma (bo̠cho̠r) reaḱ do̠saraḱ purạute cando gahna kana . Niạ dhao reaḱ cando gahna do̠ bargel miť sãi bo̠cho̠r (2001 kho̠n 2100) reaḱ ạḍi ghạṛić utạr purạute cando gahna kana . Noa reaḱ o̠kte̠ tahẽna 1 ghạṇṭi 43 miniṭ . Calaoen ne̠s bo̠cho̠r reaḱ 31 januari do̠ tahẽkana 1 ghạṇṭi 16 miniṭ.

Ḍhakaren miťṭen biggan banadhao ren sendra guṭ ko baḍae ocowakada , Bangladisạm o̠kte̠ lekate cando gahna reaḱ umul eho̠bo̠ḱa 11baje 14 miniṭre , kuṭrạ cando gahna eho̠bo̠ḱa 12 baje 24 miniṭre , purạute cando gahna eho̠bo̠ḱa 1 baje 30 miniṭre .

Purạute cando gahna mucạdo̠ḱa 3 baje 13 miniṭre , kuṭrạ cando gahna mucạdo̠ḱa 4 baje 19 miniṭre . simrak’ 5 baje 30 miniṭre cando gahna do̠ caba utạro̠ḱa .

Bangladisạm kho̠n bharo̠t reaḱ o̠kte̠ do̠ 30 miniṭ tayo̠mgea . Onate bharo̠t ren ko do̠ jemo̠n 30 miniṭ tayo̠m bon lekhayma. Bangladisạm , bharo̠t , nepal sãote esia reaḱ disạm ko , iurop , apphrika , o̠sṭrelia , niujilẹṇḍ disạm ko kho̠n hõ noa cando gahna ńel ńamo̠ḱa .

Miť biggo̠pti re arhõ ko baḍae ocoakada , siń cando ar ńindạ cando menaḱ kin sojhe re , tin o̠kte̠ pirthimi do̠ ungkin talarei se̠ṭe̠ro̠ḱa , un o̠kte̠ rege pirthimi reaḱ umul do̠ ńindạ cando cetanre paṛaoḱa . Onate pirthimi kho̠n mo̠neḱ kana , ńindạ cando do̠e e̠se̠do̠ḱkana . Cando gahna calaḱ o̠kte̠re̠ cando do̠ araḱ geye ńelo̠ḱa . Noa reaḱ karo̠n do̠ hoyoḱkana , siń cando kho̠n tho̠ṛa marsal pirthimi reaḱ ho̠y nakha se̠ćte̠ pạsirkate nindạ cando cetanre paṛaoḱa . Araḱ ro̠ng do̠ ko̠m ge pạsiro̠ḱ khạtir , ona do̠ ńindạ cando cetanre ńurhạḱa . Onate ńindạ cando do̠ araḱ geye ńelo̠ḱa .

Biggan banadhaoren sendra guṭ ren mukhiạ mohammo̠d shahjahan mridha do̠ye̠ menakada , siń cando gahna khạli mẽťte ńeńel do̠ khuti ge rehõ , ńindạ cando̠ gahna khạli mẽťte ńeńel do̠ bang khutiya . Ńindạ cando gahna ńel lạgiťte̠ ṭeliskop se bainokular ko reaḱ jạruṛ do̠ bạnuḱa . To̠be mo̠jte ńel lạgiť do̠ noako reaḱ beohar do̠ gano̠ḱ gea . Chubi tumạl rakap̕ lạgiť do̠ jumlens kemera(zoomlens) tahẽn khan ge hoyoḱa .

Noa o̠no̠l pasnaoakana:
  •  
  •  
  •  
  •  
  •  
  •  
  •