Main Menu

Kạṭic̕ Umạrre Bapla Santal Somajak̕ lahanti Akoṭeda

Kạṭic̕ Umạr Bapla oka do̠ Ạṅgreji teko metak̕kana “Child Marriage”. Oka do̠ Jahan disạm se somaj lạgit̕ mit̕ ạḍi lạṭu samajik eṭkeṭõ̠ṛẽ̠ kana. UNFPA (United Nations Population Fund) 2019 kho̠bo̠r lekate baḍaeok̕ kana Dạkhin Asia modre kạṭic̕ umar bapla re Baṅladisạmak̕ jaega do̠ pạhil re ar goṭa dhạrti re pon no̠mbo̠r ar nonḍe kạṭic̕ umar re bapla so̠tko̠ra 59%. Judi hõ̠ sarkari hisạb leakte noa do̠ so̠tko̠ra 52% kana. Pạhil kho̠n mõ̠ṛẽ̠ disạm re oka kore jạsti kạtic̕ umạr rec̕ bapla hoyok̕a, Baṅladisạm bạgi kate sanam ge afrika renak̕ re̠nge̠c̕ disạm kana. Noa obosta Baṅladisạm ren baṅgali jạt koak̕ hoelenakhan, Santal somajak̕ phoṭo ạḍi baṅ bhạlại gea.

UN (United Nation) e tearakan Kạṭic̕ gidrạkoak̕ ạn lekate, ko̠ṛa do̠ komse kom 21 umạr ar kuṛi do̠ komse kom 18 umạr hoyok̕ jạruṛ. Noa do̠ goṭa disạm ren ho̠ṛ geko ataṅkada ar ṭhik geko metak̕ kana, cedak̕je unạk̕ umạr rege manwa  doe juạnok̕ kana ar gharońj reak̕ bhar ladejoṅ lạgit̕e tearok̕ kana. Kạtic̕ jãhãe ho̠ṛ bapla lenkhan, bando nao dhạrti reak̕ soṅsar babaot, ar baṅ do̠  ho̠ṛmo teak̕ so̠mbo̠nd cet̕ kana mente, ona babod baḍae. Onate Baṅladisạm sarkar hõ̠ United Nations reak̕ goṭa katha leka geye senak̕ kana. Ar Baṅlaisạm rehõ̠ baplak̕ lạgit̕ umạr do̠ ko̠ṛa lạgit̕ 21 ar kuṛi lạgit̕ do̠ 18 umạr kana.

Kạṭic̕ umar porbosti (Protection) ạn, 2017 (Ballo bibaha nirod ain -2017)18 umạr ren kho̠n kom umạrren ko̠ṛa/ Kuṛi judi 21 kho̠n kom umạr ren ko̠ṛa se kuṛi são bapla lenkhan, enḍekhan tobe ona do̠ ạn lekate kại se ạḍi maraṅ gạlti kana. Adalotak̕ onumuti begor 18 umạr ren jahae ko̠ṛa se kuṛi baṅkin bapla daṛeak̕. 21 umạr kho̠n kom ar 18 umạr kho̠n lạṭu umạrren jãhãe ko̠ṛa se kuṛi judi 18 umạr ren ko̠ṛa se kuṛi são bapla lenkhan, tobe menkhan onkan ho̠ṛ do̠ ona ạn lekate 1 candoko hajo̠tea ar 50,000 ṭakae ḍamḍom ocok̕a.

Menkhan noa ạn re mit̕ gạliti menak̕, Noạ ạn renak̕ mit̕ dhara lại menak̕, Bises kaṛonte kạṭic̕ umạr ren ko̠ṛa kuṛiak̕ bapla reak̕ aphsor menak̕a. Menkhan kaṛon do̠ cet̕ hoe daṛeak̕a?, ar noa ạn re tino kạṭic̕ umạr renko bapal daṛeak̕a noa do̠ saphate o̠l bạnuk̕a. Noa babod ạn gạhir macha o̠lo̠k̕ kana. Noa ạn ren lại menak̕, “Jaha ge hoe ocoge, bises kaṛonte kạṭic̕ umạr ren maejiuak̕ apnar bhạlại lạgit̕, Adalotak̕ hukum ar go̠go̠ babak̕ noa babod mot em kate ṭhik dhara pańja katec̕ bapla lenkhan ạn hisạbte ona kại mente baṅ aṅgoc̕ak̕.

Noa ạn tahẽn tuluc̕ baṅladisạm re Mulsạ se Hindu somaj re ạḍi din kho̠n ge kạṭic̕ umạr bapla menak̕. Netar ạn benao akan rehõ̠ aema ho̠ṛ ge ona bako moneak̕ kana. Ar santal somaj rehõ̠ jahan o̠l ạn bạnuk̕a. Kạṭic̕ umạr re bapla jạtsi ge ńelok̕ ato disạm re, ar bajar aṛe noa do̠ ṭhora ge ńelok̕a. Noa disam re jạsti santalko ato disạm reko girạbasikana. Judạ juḍa deko somaj lekan santal somaj re kạtic̕ umạr bapla reak̕ kaṛon do̠ kana:

1)Oṛak̕ renak̕ re̠nge̠c̕

2)Tino umạr re bapla hoyok̕ ona babod santal samajik o̠l ạn bạṅ tahẽn

3)Go̠go̠ babak̕ bhage o̠lo̠k̕ paṛhao baṅ baḍae iạte

4)Kuṛi se Maejiukoak̕ salsãt (Security) ṭana ṭạni

5)Go̠go̠ Babak̕ Hus renak̕ awaṭapa

6)Deko Somaj reak̕ bạric̕ samajik obosta

7)Kuṛi do̠ gharońjren bhar hisạbte hudis

8)Kạṭic̕ umạr porbosti (Protection) ạn sarkar ho̠te̠te̠ baṅ panjae

9)Sanatal somaj ren mańjhi ar paranik mukhiạkoak̕ komjori

10)Santal kạṭic̕ ko̠ṛa kuṛiak̕ aṅgir kạmi

Noṅka leka aema kaṛon menak̕ santal somaj re kạṭic̕ umạr bapla babod te. Menkhan sarakar ạn lekate calaolen khan sạrige ko̠ṛa ar kuṛiak̕ hoṛmo ar hudisko jowaoge tahẽna. Ạḍi gidrạ rege bapla khan do̠ aema jaega rebon ńel akada gidrạ do̠ reṭhe-reṭhe ko janamok̕a. Onkoak̕ oka leka hoṛmo tahẽn jạruṛa onkan hoṛmo do̠ khica bapla kho̠n janamk̕ kan gidrạkoren ńel daṛeak̕. Kạṭic̕ umạr reko bapla khan somajre onko lạgit̕ aema lekan muskilak̕ hoe daṛeak̕. Kạṭic̕ gidrạko gidrạ eṅgat jokhec̕ go̠go̠ ho̠ṛ goc̕ hõ̠ goc̕ daṛeak̕. UNICEF ak̕  report re ńelok̕ kana, kạṭic̕ umạr bapla lạgit̕ 2 lakh janam gidrạ pusṭi (Nutration) obhab ar bhar ạḍi thora hoyok̕kan takoa ar go̠go̠ak̕ hoṛmo hõ̠ bạric̕ok̕ kana. Dinam serma go̠go̠ hoe lạgit̕ Disạm 1000 ho̠ṛ modre 5 goṭen maejuko gujuk̕ kana. Ona chaḍa janam jokhec̕ 1000 gidrạ modre 90 goṭen gidrạ ko gujuk̕ kana ar Mit̕ umạr ren gidrạ 70 goṭen katec̕ko gujuk̕ kana. Ar noko thora umạr reko bapla lenkhan gidrạ o̠kte̠ reak̕ jahan aṭkar do̠ bako ńamet̕ kana. Ar kạṭic̕ regeko bapla lenkhan, baṅ do̠ akoko jo̠to̠no̠k̕ ar baṅ do̠ gidrạko jo̠to̠koa. Uniak̕ kạṭic̕ re soṅsar reak̕ bhar ladeako do̠ mońj baṅ ńelok̕a.

Onate santal somaj ren o̠lo̠k̕ paṛhao juạn, Somaj ar Rajạri mukhiạ, Somaj susriạko somaj kho̠n noa eṭkeṭõ̠ṛẽ̠ bại bại cabae lạgit̕ e̠hbhe̠n jạruṛ. Santal somaj aema lekan soṅghton menak̕a, onko hõ̠ noa babod somaj re kạmi lagak̕a. Go̠go̠ babak̕ noa babod jạsti hudis lagak̕, gidrạkoak̕ bhage bạric̕ babod mit̕ são gapalmarao lagak̕a. Kạṭic̕ kạtic̕ ko̠ṛa kuṛi gidrạko ako tege auri umạr aṅgirok̕ se auri umạr re bapla se eṅgat-apat hoe renak̕ kukmu bạgi lagak̕. Oka kaṛonte mit̕ gharoń, disạm ar ona disạmak̕ lahanti sagar tayo̠mte so̠lo̠ṅ calak̕ kana. Jaha jaega re kạtic̕ umạr bapla hoelenkhan upajilạ se thana rebon jogajog lagak̕. Aso̠l katha noa ge sarkar do̠ ạn kadae kạtic̕ umạr bapla komao lạgit̕. Tobe Ạn kho̠n pasec̕ samajik Hus E̠bhe̠n jagwar ge ạḍi jạsti jạruạ santal somaj re.

Photo : UNICEF Website

Noa o̠no̠l pasnaoakana:
  •  
  •  
  •  
  •  
  •  
  •  
  •