Teheń do̠ santali pạrsi sãohẽ̠t́ren maraṅ sãohẽ̠diạ ar pạrsibid P.O. Boddingaḱ 156aḱ janam bạchṛikantaea.

P. O. Bodding Ar Peṛa Ho̠ṛ 
P.O Bodding do̠ santali sãohẽ̠t́re oka e̠ne̠m menaḱtae ona do̠ sạrige he̠ṛan maraṅ utạraḱge. Bọḍiṅ saheb do̠ mit́ṭe̠n maraṅ atmawan ho̠ṛge uni o̠ko̠e do̠ santali pạrsi aćaḱ go̠ pạrsi kho̠n hõ̠ jạstiye dulạṛkeda ar ona hara buruire aćaḱ purạu jiṅgeye alaekeda. Sạrige santali sãohẽ̠t́ lạgit́ uniaḱ kạrdhạni do̠ o̠ho̠ge bara bạrilena. Santali sãohẽ̠t́ reaḱ naṅgamre Bọḍiṅ sahebaḱ ńutum do̠ jo̠to̠ kho̠n jạsti jhalkaoḱ ipil leka tire juge jhak jhakaoḱtege tahe̠na. E̠ke̠n inạ sumuṅ do̠ baṅ bicko̠m santali pạrsi sãohẽ̠t́ dulạṛiạkoaḱ o̠nto̠r thanre jaoge jive̠t́e tahe̠na.
P.O. Bodding aḱ Bharo̠t se̠ṭe̠ro̠ḱ:-
Ạḍi mano̠tan Bọḍiṅ saheb do̠ eṅgat apataḱ me̠njo̠ṅaḱ ar aćaḱ e̠kraṛ katha purạu lạgit́te 1889re pasṭo̠re o̠jo̠ḱ bahalen tayo̠mge 05 December 1890 hilo̠ḱ aćaḱ janam diso̠m bạgi oṭokate Bharo̠t reaḱ ho̠ṛ ho̠po̠nko talare hijuḱ lạgit́e oḍoṅena. Uni do̠ 16 January 1890 sal reaḱ ạḍi rabaṅ setaḱre Santal Parganare menaḱ Benagaṛiạ ńutumanaḱ miso̠n ḍiṇḍarey se̠ṭe̠rena. Un jo̠khe̠ć uniaḱ ume̠r do̠ bar ge̠l pon serma tahẽ̠kantaea. Un jo̠khe̠ć o̠ṇḍey tahẽ̠kan H.P Boerresen (Papa saheb) ren dho̠ro̠m juri Caroline Boerresen (Mama saheb)  ar Earnest Huemannren oṛaḱ ho̠ṛ tạkin do̠ uni ạḍi urgum salaḱkin ataṅ daramledea.
Mit́ cando̠ reaḱ jeleń saṅgarte laṅga lorao ho̠ṛmo̠ jirạu baṛakate mano̠tan juạn Bọḍiṅ do̠ ar hõ̠ tisge baṅ thiroḱ saṅgarrey oḍoṅena. Uni do̠ aćaḱ noa saṅgarre mit́ṭe̠n buru de̠jo̠ḱić leka mit́ṭe̠n buru reaḱ muthni jo̠ṭet́kate ar hõ̠ eṭaḱaḱ usul buru muthni jo̠ṭeḍ lạgit́ jaoge laha ar laha se̠će rakaṕ calaoena. Be̠teṅgo thir, be̠jirạu, jit ḍaharre mucạt́ sahẽ̠t́ hạbićge. Noa do̠ uniaḱ rikiṛ kurumuṭu ar  ạjgut kạrdhạni reaḱ so̠ro̠s jo̠ge tahẽ̠kana je uni do̠ santal ar santali reaḱ ńutum diso̠m duniạ reaḱ piṇḍạ paṭalrey jhak jhakao rakaṕkeda.
Bọḍiṅ saheb no̠ṇḍe se̠ṭe̠ro̠ḱ pe̠ cando tayo̠m kho̠nge santali reaḱ pạhil kho̠bo̠r kago̠c ‘Ho̠ṛ Ho̠po̠nren Peṛa Ho̠ṛ‘ ńutumte 01 May 1890 sal kho̠n chapa so̠do̠ro̠ḱ e̠ho̠ṕena. Noaren sasapaṛaoić do̠ L.O Skrefsrud (Kerap saheb)e tahẽ̠kana, uni o̠ko̠e do̠ aćren so̠ṅge H.P Boerresen tạkin 1867 salre Benagaṛiạ atore Ebenezer miso̠n ḍiṇḍại thapo̠nleda. Kerap saheb do̠ santali pạrsi cetanre ạḍi do̠kho̠l tahẽ̠kantaea. Bọḍiṅ saheb do̠ Benagaṛiare tahẽ̠kan pạhil santal kuṛikoaḱ iskulren kurịkoaḱ sereń ańjo̠mte ạḍie mạluṅo̠ḱ ar bharoḱkan tahẽ̠kana. Onatege pase̠ć no̠ṇḍe se̠ṭe̠r torage santali pạrsi cetan dulạṛ do̠ ạḍi usạra sarsaolentaea. Santali do̠ noa dhạrti reaḱ usạra baṅ cedogo̠ḱ mit́ṭẹn pạrsigekana. Me̠nkhan Bọḍiṅ saheb do̠ e̠ho̠ṕ kho̠nge mit̕ṭe̠n pạrsibid lekateye tahẽ̠kante noa ạnạṛi pạrsi cedre aema o̠kte do̠ baṅ lagaoadea. Ać ge̠l serma umerrene tahẽ̠kana jo̠khe̠ćge Laṭin ar French lekan muskil pạrsi cetanre ektiạrimae calao cukạuakat́ tahẽ̠kan, o̠ne oka do̠ unạḱ kạṭić umerre onakin pạrsi seṛãe do̠ unaḱ alga katha do̠ baṅ tahẽ̠kana.
P.O Bodding Ar Peṛa Ho̠ṛ:-
Ho̠ṛ Ho̠po̠nren Peṛa (1890-1904) ge̠l pon serma hạbić chapa so̠do̠ren tayo̠m ce̠t́ko khạtirte co̠ thir hapeyena. Ona o̠ktere Bọḍiṅ saheb do̠ Ho̠ṛ Ho̠po̠nren Peṛaren go̠ḱṛo̠ić lekateye tahẽ̠kana. Bọḍiṅ sahebaḱ santali sãohẽ̠tre aćaḱ e̠ne̠m do̠ to̠rjoma kho̠ngey e̠ho̠ṕ maṛaṅleda. Inạko talare Bọḍiṅ saheb do̠ aema santali ho̠ṛ kạhni ar o̠no̠lkoe sapṛaokeda. Kho̠bo̠r kago̠c chapa so̠do̠ro̠ḱ thukumen ge̠l irạl serma tayo̠m Bọḍiṅ saheb do̠ ar hõ̠ dohṛate kho̠bo̠r kago̠c chapa so̠do̠re me̠nwana. Uni do̠ santali pạrsi cetanre nunạḱ do̠kho̠le do̠ho̠keda je nito̠ḱ ar duṛuṕ thiro̠ḱ do̠ bae tahẽ̠ daṛeada. Ar noṅka leka Ho̠ṛ Ho̠po̠nren Peṛa ńutum nase bo̠do̠lkate ‘Peṛa Ho̠ṛ‘ ńutumte pạhil January 1922 serma kho̠n chapa so̠do̠ro̠ḱ e̠ho̠ṕena. Noa do̠ santaliteaḱ dosar ar pạhil bar haptakiạ kho̠bo̠r kago̠cge hoyena. Noa kho̠bo̠r kago̠c do̠ santali pạrsi sãohẽ̠t́ hara rakabre mit́ṭe̠n unuduḱ dhiri leka bit́ena. Noa kho̠bo̠r kago̠cte somajre mit́ṭe̠n maraṅ bo̠no̠do̠le sirjạukeda.
Bọḍiṅ saheb do̠ aćaḱ sasapaṛaoićaḱ katha talate pạṭhuạkoaḱ dis hudis ar onkoaḱ mo̠ne̠ reaḱ katha kho̠bo̠r kago̠cre ạḍi mano̠t salaḱ ṭhạ̃ie emawada, o̠ne oka do̠ mit́ṭe̠n kho̠bo̠r kago̠c caḱlao reaḱ mit́ṭe̠n ạḍi napae gungekana. Boḍiṅ saheb do̠ noa kạmire jitạuakan ho̠ṛe tahẽ̠kana. Ona reaḱ e̠se̠rge tahẽ̠kana je Peṛa Ho̠ṛ kho̠bo̠r kago̠cre aema ho̠ṛ o̠lo̠ḱ lạgit́ko uskurena ar namjạdi o̠no̠liạ ar õ̠nõ̠ṛhiạko janamena. Onko modre K.N Tudu, Jacob O Soren, Nukạ Marandi, Bạriạṛ Soren, Jalpa Soren, S. Murmu ‘Cạṭai’,  S. Soren, RRK Rapaz, D. Baṛka Kisku, P.J Soren, G.C Tudu, M.M Tudu, Basudev Besra eman aemako tahẽ̠kana. Peṛa Ho̠ṛ kho̠bo̠r kago̠cre do̠ e̠ke̠n dho̠ro̠m reaḱ katha mo̠to̠ do̠ baṅ tahẽ̠kana bicko̠m o̠no̠l, o̠nõ̠ṛhẽ̠, kạhni, gam, kudum, kạhtuk emanko ạḍi saṅge cehaona dahar unuduk̕ kathakoge chapa so̠do̠ro̠ḱkan tahẽ̠kana. Inạ são-sãote ho̠ṛ ho̠po̠nko apnar ho̠ṛmo̠ sãohãr, oṛaḱ duạr sapha sạphi do̠ho̠e se̠ćte aodhano̠ḱ, cas bas se̠ćte lahako lạgit́te hõ̠ aema daman daman o̠no̠lko chapa so̠do̠ro̠ḱkan tahẽ̠kana. Uni do̠ Peṛa Ho̠ṛ kho̠bo̠r kago̠cren sasapaṛaoić lekate ge̠l pon serma hạbiće tahẽ̠kana.
Peṛa Ho̠ṛ Ar Bọḍiṅaḱ me̠njo̠ṅaḱ:–
Kho̠bo̠r kago̠c do̠ ho̠ṛko ṭhe̠n aema lekan kathako se̠ṭe̠r reaḱ mit́ṭe̠n ạḍi jo̠jaoḱ ar alga sapaṕkana. Kho̠bo̠r kago̠ćge mimit́ ho̠ṛ sãoe galmaraoa onko ṭhe̠n ho̠ṛmo̠ rupte bin calaotege. Boge judạ kho̠bo̠re kola noa kago̠c do̠. Ho̠ṛ hõ̠ noa do̠ko kusiaḱa e̠nte aema lekan kathako babo̠tte cạriạ ko̠ṇḍ kho̠n oṛaḱre duṛuṕkateko baḍae daṛeaḱa, binạ jãhã se̠ć calaotege. Boḍiṅ saheb do̠ kho̠bo̠r kago̠c reaḱ mo̠ho̠t ar daṛe do̠ ạḍi laha kho̠ngey baḍae oromakat́ tahẽ̠kana. Onatege Boḍiṅ saheb do̠ Peṛa Ho̠ṛ kho̠bo̠r kago̠c ho̠te̠te ho̠ṛko são galmarao, boge judạ kho̠bo̠r lại, baḍae ocoko ar so̠mpok joṛao lạgit́tege noa sapaṕ do̠e beoharleda. Peṛa Ho̠ṛ kho̠bo̠r kago̠c chapa so̠do̠r reaḱ uniaḱ jo̠s, mo̠tlo̠b ar me̠njo̠ṅaḱ do̠ noakoge –
1. Peṛa Ho̠ṛ kho̠bo̠r kago̠c ho̠te̠te bhage sombat lại pasnao. Baebel reaḱ kathako algate bujhạuako ar bhe̠d bhaṅgaoakote ona reaḱ gạhirtet́ baḍae ocoko.
2. Peṛa Ho̠ṛ kho̠bo̠r kago̠c ho̠te̠te santalko o̠lo̠ḱ ạkilte lahako, e̠nte sikhnạt bego̠rte oka somaj hõ̠ o̠ho̠ge laha daṛelena.
3. Kho̠bo̠r kago̠c ho̠te̠te  maṇḍerren ho̠ṛko miso̠n reaḱ utnạu kạmiko ar de̠s bide̠s reaḱ kho̠bo̠r baḍae ocoko.
4. Santalkoaḱ gam, kạhni, kudum, kạhtuk o̠ne ona do̠ sedae jug kho̠n moca mocate lại capal hijuḱkan, chapa so̠do̠ro̠ḱte jogao do̠ho̠ daṛeaḱ.
5. Santalko akoaḱ go̠ pạrsite o̠lo̠ḱ lạgit́ uskurko, je̠mo̠m akote akoaḱ pạrsi sãohẽ̠t́ko hara buru daṛeaḱ ar tayo̠m daram ako lạgit́ bạrphạiaḱ ar somaj lạgit́ damnaḱ hoe daṛeaḱ.
6. Peṛa Ho̠ṛ kho̠bo̠r kago̠c ho̠te̠te ho̠ṛ ho̠po̠nko apnar oṛaḱ sapha sạphi, apnar ho̠ṛmo̠ niro̠pon do̠ho̠e, suluk ar rạskạ ghãrõ̠ńj babo̠tte aodhanko.
7. Peṛa Ho̠ṛ kho̠bo̠r kago̠c ho̠te̠te ho̠ṛ ho̠po̠nko ako aḍepasere menaḱ ran re̠he̠t́ babo̠tte baḍae ocoko je̠mo̠n ruạ hasok̕re akoteko ran murgạn daṛeaḱ.
8. Peṛa Ho̠ṛ kho̠bo̠r kago̠c ho̠te̠te ho̠ṛ ho̠po̠nko cas bas babo̠tte baḍae ocoko. O̠kte nạpitre oka lekan pho̠so̠l khe̠t baṛgere lagaolekhan ce̠t́leka pho̠lo̠n arjao daṛeaḱa. Cas baste ke̠ṭe̠ćlen khange re̠ṅge̠ć kho̠n bańcaoḱte gharõ̠ńj napaete calao daṛeaḱa.
Ar noṅka leka mano̠tan Bọḍiṅaḱ lase̠r hataṅ kho̠n oḍoklen ‘Peṛa Ho̠ṛ‘ kho̠bo̠r kago̠c ho̠te̠te ho̠ṛ ho̠po̠nko talare somaj ạri, kạuḍi ạri ar dho̠ro̠m ạri se̠ćte bo̠no̠do̠l ạgui pontha do̠ ạḍi jojaoentaea. Bar haptakiạ kho̠bo̠r kago̠c ‘Peṛa Ho̠ṛ‘ do̠ santali pạrsi sãohẽ̠t hara burui ar laga lahae reaḱ mit́ maraṅ sagaṛo̠m lekae kạmikeda. Noa ho̠te̠te somajre jagwarre janam ocokeda ar aema ho̠ṛ o̠lo̠ḱ lạgit́te uskur lahaket́koa. Noa kho̠bo̠r kago̠c do̠ niạ hạli aema to̠ho̠t́ tạkićaḱko sahao paro̠m tuluć ghaney calaḱkana ar oka do̠e jirạuoḱkana. As menaḱa nui ‘Peṛa Ho̠ṛ’ aboko ar hõ̠e hiri tioḱbona.
– Besra ‘Bepari’
Taṛam Pańja:
1.Paul Olaf Bodding (His Call And His Service) Elizabeth, Dordal.
2. Rev. Paul Olaf Bodding – 1865-1938 (Ek Sankshipt Jivni) Dr. Besra, Basudev.
3. Paul Olaf Bodding (Jivni Aur krititwa) Dr. Marandi Louis.
4. Some Remarkable Persons Of The NELC, part- 1Dr. Tudu, M.M.
5. Brief History Of Santali Literature And Writers- Hembrom, Ezicheal.
6. Sãotali Sahityer Itihas, Mn.Hembrom, Parimol
7. O̠no̠liạkoaḱ jion Cạrit- Soren Gabriel
8. O̠no̠liạkoaḱ Jion Cạrit – Kisku, R.C.
9. Santali O̠no̠l Sakam Reaḱ itihas- Pạhil Hạṭiń. Soren, Gabriel
10. P.O Bodding Dinisạ – 2011.

Comments are closed.