P.O. Boḍiṅak̕ Irạl Ge̠l Pe̠ak̕ Gur Bạchri

September 25 tạrikh  do̠ santali pạrsi sãohẽ̠t́ren maraṅ pạrsibidh, maraṅ o̠no̠liạ, maraṅ sasapṛaoić, maraṅ murại be̠ḱnaoić, maraṅ to̠rjomaić, maraṅ tuḱmạlić, maraṅ kho̠dro̠niạ, maraṅ ạkilanić,maraṅ guru ạḍi mano̠tan P.O Bodding aḱ irạl ge̠l pe̠aḱ gur bạchrikantaea. Uniaḱ noa gur bạchṛire sae sae johar ar mano̠t baha apanjale.

Noa tạrikge Norway diso̠mren ńutuman miso̠nạri Paul Olaf Bodding do̠ Denmark diso̠m reaḱ Odense ńutumanaḱ jaegare setaḱ ṭahlaoḱ jo̠khe̠ne be̠nḍaoena ar tarasiń 2.30 baje leka aćren dulạṛiạ juri Christine Larsen Bodding aḱ ho̠bo̠rre mucạt́ sahẽ̠t́e hataoleda. Unjo̠khe̠ć uniaḱ ume̠ṛ do̠ eae ge̠l pe̠ serma tahẽ̠kantaea. Christine Larsen Bodding do̠ ńutuman ḍakṭo̠re tahẽ̠kana me̠nkhan bidhi reaḱ bidhan calaḱ ho̠ṛ do̠ o̠ko̠e hõ̠ bam ruạṛ daṛewaea.
Boḍiṅ sahebe calao lahaente santali sãohẽ̠t́ reaḱ ạḍi maraṅ loksange hoyena.
Boḍiṅ saheb do̠ Bharo̠t diso̠m reaḱ santal Pargana jilạre menaḱ Benagaṛia Mission ḍiṇḍạre pạhil dhao 16 January 1890 salrey se̠ṭe̠rlena. Un jo̠khe̠ć uni do̠ bar ge̠l bar serma umerren juạn koṛae tahẽ̠kana. Mit́ cando Benagaṛiare jirạukate Dumka Rampurhat so̠ṛo̠kre menaḱ Mọhulpahaṛi ńutumanaḱ miso̠n ḍiṇḍatey ucạṛ calaoena. O̠ṇḍe̠ tahẽ̠katege uni do̠ santal ar santali sãohẽ̠t́ lạgit́e ge̠rbit́lena. Uni do̠ Mọhulpahaṛire bar ge̠l pe̠ serma kạmikate Dumka naṅgrahare menaḱ Mission Compound tey ucạr calaoena. O̠ṇḍe ge̠l bar serma kạmikate ar hõ̠ Mọhulpahaṛitey ruạṛ halaena ar mucạt́ hạbić o̠ṇḍe̠gey tahẽ̠yena. Uniaḱ ạḍi mo̠nsubạ tahẽ̠kantaea je ho̠ṛ ho̠po̠nko talare aćaḱ mucạt́ jibo̠n hạbić no̠ṇḍegey tahe̠n me̠nkhan onka baṅ hoelena. Uni do̠ ako diso̠m Norway te ruạṛ calaḱ reaḱ hukume ńamkeda. Uni do̠ santal ar santali são noṅkae milạu mit́akan tahẽ̠kana je ona kho̠n chapaḍaoḱ do̠ ạḍi ajhãṭge tahẽ̠kana. Santal ar santali são uniaḱ dulạṛ to̠no̠l do̠ ạḍi gạhirge tahẽ̠kantaea.
Mano̠tan Boḍiṅ saheb do̠ ako diso̠mte ruạṛ calaḱ reaḱ hukume ńamket́ khan 16 April 1934 salre Dumka reaḱ Bandarjori Mission Compound re mucạt́ bidạ joharko emawadea.
Mano̠tan Johhanes Gausdal do̠ noa bidạ johar akhṛa caḱlaoić lekatey tahẽ̠kana.
Boḍiṅ sahe̠b do̠ ho̠ṛ ho̠po̠nko talare pon ge̠l pon serma tahẽ̠kate aćaḱ sanam ạkil ar daṛe santal ar santali lạgit́te alaeleda. Khạṭi kathakangea je noṅka begar calaoḱ do̠ ạḍi hasoanaḱ kathakange. Ar noṅka leka Boḍiṅ saheb do̠ aćren dulạṛiạ juri Dr. Christine Larsen Bodding são ho̠ṛ ho̠po̠nkoaḱ dinạm din reaḱ beoharo̠ḱ jinisko so̠mo̠lkate ạḍi hamal mo̠ne̠ante ako diso̠mtey ruạṛ calaoena.
Mucạt́ bidạ johar akhṛare no̠ṇḍen ho̠ṛ ho̠po̠nko lạgit́ aćaḱ mucạt́ katha ar sandes ạḍi gạhir duk salaḱ noṅkae lại so̠do̠rkeda-
Dulạṛiạ boeha ar miserako
Khạndri mo̠ne kho̠n ạḍi duk salaḱ noa lạiape hoyoḱkantińạ je̠ ape kho̠n sạṅgiń calaḱ reaḱ hukum he̠ćạdińa. Sana tahẽ̠kana je̠ apeko talarege je̠mo̠n iń hõ̠ń topa ocoḱ, me̠nkhan onka baṅ hoe daṛeaḱkana. Onate bidạḱ reaḱ o̠kte̠ do̠ se̠ṭe̠rena.
Ape do̠ ạḍi maraṅ jạt kanape, Iso̠rren bachao ho̠ṛko kanape, apeaḱ itihas do̠ ạḍige so̠ro̠s ar pe̠re̠ć purungea.
Apeaḱ saṕdaṕ ar ạricạli, le̠g acar reaḱ ạri bạndhi do̠ o̠l rakaṕkate iń sãoiń idi torayeda. E̠nte̠ noako rạkhi jogao do̠ho̠e lạgit́ nit bape sapṛao daṛeakawada. Noa do̠ apeaḱ dho̠nge, ale diso̱mre noa dho̠n rạkhi jogao do̠ho̠kaḱ reaḱiń be̠bo̠sta oṭokaḱkana. Ado̠ jãhãtis le̠kmanpe hoyoḱ, unre noa do̠ suṭik tiạgpe, noa do̠ apeaḱge tahe̠na.
 —- P.O. Bodding 

Comments are closed.