Tẽhẽńak̕ Din Do̠ E̠ke̠n Babko Lạgit̕ge.

Noresh Hasdak

Jo̠to̠ ho̠ṛak̕ bithri monere mit̕ṭen kukli odok̕ daṛeak̕a, baba dulạr lạgit̕ do̠ cet̕ e̠ken mit̕ṭen dinge ? Baba cetan gidrạ koak̕ dulạṛ- dupulạṛma dinạm dinge ńelok̕kan. Kukli rakap̕ocoan enrẽhõ noa dhạrti puriren ho̠ṛko̠do̠ baba cetan dulạṛ uduk̕ lạgit̕ mit̕ṭen din dohoko menjoṅkana, cet̕ leka gogoko lạgit̕hõ mit̕ṭen din doho menak̕a onkalekage. Ona iạte tẽhẽń do̠ baba dulạṛ mãhã manaook̕kana. Goṭa dhạrti reak̕ 52 goṭen disạmre noa mãhã manaook̕kana. Baba cetan gidrạ koak̕ dulạṛ uduk̕ lạgit̕ noa din do̠ dohoakana. Bochor reak̕ June candore tesarak̕ aṭhwar hilok̕ noa mãhã manaok̕kana. Ona lekatege nẽs hõ 20 June noa din manaok̕kana. Noa baba mãhã manao do̠ ehop̕akana 1900 sal reak̕ etohop̕ sec̕re. Ar noa m̃ahã manao reak̕ e̠ke̠n mit̕ṭenge karon tãhẽkana ar onado hoyok̕kana baba cetan gidrạ koak̕ dulạṛ-dupulạṛ sodor. Menedako 1908 sal reak̕ 5 July pạhil dhao leka America reak̕ pạchim varjenia elạka fearment re mit̕ṭen girjạ oṛak̕re manao hoelena. Dhạrtire nitok̕ do̠ ạḍi rạskạ ar manot salat̕ noa mãhãko manaoeda. Menkhan etohop̕redo unạk̕ jạsti mojtedo bako manaoet̕ tãhẽna. Maraṅ katha do̠ hoyok̕kana, ho̠ṛkodo gogo mãhã lạgit̕ tinạk̕ dorodko uduk̕et tãhẽn, baba mãhã lạgit̕ unak̕ dorod do̠ baṅ tãhẽkana. Bạe bạete noa obostha reak̕ bodol do̠ hec̕akana. 1913 salre America reak̕ parlament re baba mãhã chuṭi e̠mok̕ lạgit̕ mit̕ṭen bilko rakap̕leda. Tayom daramte 1924 salre ũn okteren president Calvin coliz ona bilre sãeye emada. Mucat̕re 1966 salre president Lindon B. Jonson baba mãhã do̠ chuṭi din hisab teye dhạrwak̕ keda. Ado dhạrti reak̕ eṭak̕ eṭak̕ disạmko leka bangladisạm rẽhõ bochor reak̕ June candore tesarak̕ aṭhwar hilok̕ noa mãhã manaok̕kana. Gogo mãhã leka, baba mãhã hõ dinke din ho̠ṛko mudre manao reak̕ kurumuṭu ńelogok̕kana. Kạṭic̕ khon gidạr-pidạr haraburu katek̕ apnar gidrạ moj ṭhãire idiko lạgit̕ tinạk̕ duk ar kosṭo babako sahaoeda ona lạgit̕ onko cetanre gidrạ koak̕ dulạṛ-dupulạṛ sodor lạgit̕ noa mãhã manaook̕kana. Noa mãhã manao lạgit̕ aema lekan ka ạituk̕ nelogok̕kana gidrạko mudre, okoydo kic̕ric dokan,okoydo baha-mala dokan ar okoykodo eṭak̕ eṭak̕ sandes ko kirin̕ lạgit̕ haṭ bazarko calak̕kana. Jo̠to̠ hoṛkoak̕ge kurumuṭu tãhẽna baba lạgit̕ mit̕ṭen moj sandes hatao. Nebetar Facebook ar eṭak̕ social media korehõ ńelogok̕kana baba cetan dulạṛ sodor lạgit̕ aema lekan kurumuṭu. Okoyko do̠ apnar baba sãotenak̕ photoko ladeyeda akoak̕ profile kore arhõ eṭakkodo aema moj moj katha olkatek̕ akoak̕ dulạṛko sodoreda baba lạgit̕. Okoykoren babako hanapuriakan onko noa dinre akoren babako disạet̕koa. Noako ńelte menogok̕kana baba mãhã manao do̠ jo̠to̠ jaigakorege hoyok̕kana, ar jo̠to̠ ho̠ṛge apnar lekate baba cetan dulạṛko sodoret̕takoa. Gogo baba lạgit̕ gidrạkoak̕ dulạṛ do̠ jaijug hạbic̕ saṛeṛok̕ma ar tire juge jiạṛ tãhẽnma.

Comments are closed.