Kuli jug reak̕ kubi gaona : kubi gatha

( Ko̠ṛa kuṛi ko̠ bachao kan reak̕ karon
Somaj sudhrao lahanti pontha )


1)Ańjom pema do̠s jona nit pe ańjom kubi gaona
2)Jo̠m kubi do̠ baṅ kana, se̠re̠ń kubi kana, se̠re̠ṅ kubi gaona lekhan ạḍi utạr budhi khaṭao lagak̕ .
3)kuli jug ren ko̠ṛa kuri ńẽl koabon jo̠to̠ eṅga apat hukum leka bako calaok̕ kana .
4) Eṅga apat jahanak̕ bo̠n kạmi achu e̠ṭe̠ć leko khan, hanko tora gate saõ ato seć paskaoena daran .
5)So̠ sunum alta sobun ar hõ̠ ho̠ṭo̠k̕ re tako paoḍar, lutur rema pagratako banar ti re sakom
6)Bo̠ho̠k̕ re tako manḍer sũt, ar hõ̠ baha fitạ, eta ti re mala mundạm kaṭare caṭki .
7)Ar hõ̠ bon ńẽl takoa dạmi dạmi kicric̕, noṅka teko sajao lenkhan ńẽlok̕ ako marak̕ cẽ̠ṛẽ̠ leka.
8)Dạmi dạmi kachni bande kate sajao , hanko tora ato seć ko monḍhaen coko hạṭio bajar ako kusi leka.
9) E̠nte̠ biṭi asol khaṭi cet̕ iń laeak̕ ona nio jugren kuri hõ̠ pe ona dho̠ro̠n gea.
10)Ekal te pe sajaoakan haere iric̕ bikic̕ , ho̠ṛ ko̠ṛaḱ mone repe emako kan takic̕ .
11)Ekal te pe tahen pe haere cihãk cõ̠hõ̠k , khạṭao re baṅ tape onka leka lõhõk.
12) Hatio bajar daranape haere piḍic̕ paḍa, ho̠ṛ se diko ko̠ṛa soṅge tino gaḍuć goḍak̕ .
13)Japa baraeako haire do̠kan do̠kan, ńẽl koaem cikạn co̠ko̠n haire sajaoakan .
14) Nue se hạni ko̠ṛa soṅge ro̠ṛ landaeako ho̠ṛ se diko kanae bachao bạnuk̕ tako .
15) Ape jo̠to̠ baḍae gipi diko ho̠po̠n jạt, ho̠ṛ kuri ko lạgit̕ doko ńam baraea ako khat
16)Bulạo ochoe lạgit̕ emaeya pan biṛi, onate bae buạlo lenkhan kirińaeya sạri .
17)Dạmi sạri saṅkha cuṛi ar hõ̠ paesa ṭaka , bulạo te bulạoeya hoe ochoey dokha.
18) Kirińade je̠ṅge̠d fitạ ar hõ̠ towa mala , bulạo ke̠de̠ giyae uni cet̕ menak̕ bhala.
19)bulạo oco geyae uni chinạr kuṛi, paesa ṭaka lobh adha dher arco dạmi sạri
20)Bạnuk̕ taeya bhabna bo̠to̠r banuk̕ taeya lajao so̠ro̠m , paesa ṭaka lobh te̠ge̠ at̕ kedae co dho̠ro̠m
21) ho̠ṛ ko̠ṛa ko ńẽl pea se noṅka barae kana, onko maco unreko co digḍhạ janamok̕ kana.
22) Kuli baraet̕ meako am tola ren ko̠ṛa, soṭhik barae jo̠ṅ kanaben amak̕ co̠lo̠n thora.
23)Amak̕ chinạr co̠lo̠n te̠ge̠ ńẽl me guni bhạbi , am tola ren sanam kuṛim emat̕ koa dagi.
24)Amaḱ chinạr karon te̠ge̠ ńẽl me guni bahbi, am tola ren sanam kuṛim emat̕ koa dokha.
25) Somaj hõ̠ em bạrić keda, hoyen tabon lajao, kuṛi lạgit̕ ko̠ṛa re hõ̠ janamena bachao.
26)Jo̠ho̠r macha bande kate kolsa ledam kas, tino adom agu kedam somaj reak̕ has.
27)Ńẽl koabon ho̠ṛ kuṛiak̕ tino bạric̕ gun , noṅka teko agueyda khun .
28)Ńẽl pe noko diko kuṛi tino leka ṭhat , en hõ̠ bako daṛan kana ape leka hat.
29) Chata pata ape leka bako daṛan kana, baṅ ańjo̠m akan takoa noṅka bạrić katha.
30)Ape ma ekal tec̕ hạṭio hilao mone , Tul baraet̕ leka ge̠co̠ ạikạu ape mone
31) Sauda mena tae rehõ̠ ar bạnuk̕ rehõ̠, monḍheyena piḍić paḍa ac ge dhare pare
32) Manaeyet̕ kan rehõ̠ janam eṅga apa, khe̠nche̠r ratey monḍhaena lutur banuk̕ leka
33)Noṅka gepe daranape bape ańjo̠mana, ona karon tege cope jargo cabak̕ kana .
34)Hạtio bajar daran te̠ge̠ ńẽl nueak̕ guti , bae bae te nue hoyen asa pati.
35)Asa pati maraṅ guti cet̕ iń laeak̕ ona, bae baete ado uniek̕ hamal hoṛmoena.
36) E̠ṛẽ̠ katha baṅ co koma ańjo̠m ape do̠s jo̠na , thakao cabayena ekal haire bhaba guni.
37) Okoe tae laekoa okoe ta baṅ, okoe khone ńam akada noa maraṅ dan .
38)Buḍhi kedae aema leka bae em eda ḍoka, thakao cabaena ekal nitok̕ mase uni.
34) Banuk̕ kotae he̠re̠l matae ar hõ̠ sại sãyã, ho̠ṛ ko kuli baraet́̕ kan rehõ̠ co baṅ do̠ bacoe ro̠ṛ.
40) Okoeṭak̕ lae kakoa nit mase uni , thakao cabaenae ekal haire bhaba guni.
41) Khaclạ re̠ye̠m afor keda ńẽl ńam aste bo̠ro̠.
42) Am kurena itạ ado nito janamena , hudis kedam nit noa cet̕ ko ho̠ṛ kana
43)Hudis kedam disạ kedam nito̠ ado̠ ona , cap kate̠ bohoḱ adom bhabna laṅgaena
44)Tumal jaora ho̠ṛ kana mesal aema leka , bhul tege̠yem, afor keda sajao enam boka
45) Ho̠ṛ ko̠ kuli mea nahaḱ cet́ ho̠ro̠ kana , upre̠ ho̠ṛ ko̠ am do̠ cet́ em lae akoa .
46)Tumạl jaora hoṛo itạ kana lae lekhan mac, aema mesal kante one bako hatao oco.
47) Aema mesal hoṛo rena ḍher bajar banuḱ , bhabnate mon bag tama unre khunuk̕ khunuk̕
48)O̠lo̠k̕ kuṛi o̠l khabha cet́ iṅ lae apea, bajar daran kami kodo ḍher so̠ro̠s gea
49)Jo̠to̠ ape ńẽl koa pe cet̕ iń lae ona , onko gecho bajar kore ḍher ko ńẽlok̕ kana.
50) Ho̠ṛ soṅge do̠ kom doko ro̠ṛa ro̠ṛ ko deko soṅge , ńẽl koape bajar kore ekal toṅge toṅge.
51)Dokan duạr khunṭi japak̕ hạtio bajar mela, ho̠ṛ kuṛi ar deko kuṛa ńẽl ko tino khela.
52)O̠lo̠k̕ kuṛi bajar daran arko ńẽlak̕ tuki ńẽl pe̠ nahaḱ sari katha baṅ ro̠ṛeda faki.
53)O̠lo̠k̕ kuṛi o̠l khabha ńutum tege nạmi, boge kedam ńẽl koa ḍher do̠ chinar kuri.
54)Noṅka daran tepe ńẽl pe tino guni bhabi , auri biha sadi reko ho̠bo̠r joṅ kana.
55)Cet̕ iń lae baṅ laeya saṅgat, auri biha sadi rege ho̠bo̠r joṅ eṅgat
56)Lae ge lajao para ekal cet̕ iń laeya ona, auri coko jãwãe kaya giḍarạeye hoyena.
57)Ańjo̠m pema do̠s jona boeha kotiń saṅgat, Gidrạ doko ńutum banuḱ kotae apat.
58)Noṅka tino ńẽl koaem dunia ekal jo̠to̠, eṅga apa kana coko noa koren goṛa.
59)Chinạr karon ńẽl te̠ge̠ ekal bạrić cabak̕ kana, kami kana ko seta pusi daṅgra kaḍa leka.
60)Ona reak̕ katha bachao cet̕ iń laeak̕ ona, ran jomte tino doko ho̠so̠n giḍi kana.
61)Iso̠r khone ńam akada tino maraṅ dan , nosṭo giḍi lạgit̕ onae to̠go̠ć eda ran.
62)Gidrạ doko goc̕et koa onako chinạr khuniạ , ńẽl tegeyem thakao koa kuli kaler dunia.
63)Nun garic̕ iń laeyat pea kuṛi ko̠ṛak̕ kisạ, inạ katha mucạt kate hec̕ adiṅ disạ.
64)Noa ko jape ańjo̠m keda laeyat peaṅ thora, eṅga apat kan gea ko noa koren goṛa.
65)Ko̠ṛa kuṛi hạtio bajar daranako jo̠to̠, ńẽl ko rehõ̠ eṅga apat bako basut koa.
66)Daranako hạtio bajar arhõ̠ chata pata, ńẽl ko rehõ̠ eṅga apat banuḱ mana katha
67)Hara seyanen rehõ̠ co bapla umer leka, en rehõ̠ co eṅga apat bakin barae leka.
68)lelha eṅgat apat koa bo̠yo̠s banuk̕ taya o̠ro̠m, onka leka te̠ge̠ nosṭoeyena somaj reak̕ dho̠ro̠m.
69)Din bharie rimil lekan metaoako dhunḍhi, baric̕ tuluc̕ bae baraea metaeko condho.
70)Condho eṅgat apat koa bud bạnuk̕ thora, onka teko baric̕eda netar kuṛi ko̠ṛa.
71)Noṅka te̠ge̠ hoe kana somaj dho̠ro̠m rena khagao, daya kate dulạr kate jemo̠n ona do̠bo̠n jogao.
72)Janamenae gidrạ nahak̕ parie seyae cele , dunịa reko badaeme ho̠ṛ sanam be̠le̠ te̠le̠.
73)Ho̠ṛ seyanak̕ tamaeye kuṛi rehõ̠ ko̠ṛa, jaha repem jãwãeya hoyok̕ tamae jora.
74) Unreco ko kuli meko pạris do̠ tae cet̕, nahak̕ adom lae akoa nue do̠ dhatir fet.
75)E̠nhõ̠ hoyen tama tumạl ho̠ṛ itạ , ańjo̠m ket pe kubi ona barea pea bita.
76)Cet̕ ho̠ṛ e̠ laeya nahak̕ ar okoe kana, thakao cabaena ado ańjo̠m pe do̠s jona.
77)Badae kate ho̠ṛ koma co e̠ho̠p̕ keda ro̠ṛ, bạisi coko durupena khangi ato ho̠ṛ
78)Bạisi maco hoe naco cet̕ iń laeya ona, aema utor taka gecho hoyena jaribana.
79)Kuṛi hõ̠ kuli kede laeme se biṭi , okoe soṅgem tãhe kana lae me se khạti khaṭi.
80)Okoe taey lae koa bachao getae banuaḱ , khangea cap kate dhuraoena khunu
81)Rak̕ rehõ̠em landae rehõ̠m am abada cas, tumạl ho̠ṛ itạ ona jage hoyok̕ tama fosol.
82) Khanki ado ańjo̠m kate noko mõ̠ṛẽ̠ ho̠ṛ, apat samaṅ re̠ge̠ e̠ho̠p̕ kedae ro̠ṛ.
83)Eger kedeako ekal haire ganḍe munḍe, ańjo̠m lekhan buj keam haire am kanam khạṭi, o̠ko̠r tobe laeat̕ koa amren dulạr biṭi.
84)Metadeako ekam haire am kanaem khaṭi, o̠ko̠r tobe laet koa amren dulạr biṭi
85)Boge teko ro̠ṛ kedea lae ge lajao parao, ho̠ṛ doko mendako piṭaoe̠pe̠ dhaṛa.
86)Piṭaoe̠pe̠ dhaṛa ar baṅkhan huṛuṅe̠pe̠ paṅjṛ, noṅka caeć kạmi kana ac̕ren ho̠po̠n era.
87)lajao geko ro̠ṛ kedeya bạisi ma talare, so̠bo̠k̕enae inbor tae monere ontore.
88)Boge teko ro̠ṛ kedeya cet̕ lae iń lajao nonḍe , ṭaka hõ̠ ko ḍanḍom kede haire ganḍe munḍe.
89)Jãwãe kiriń hoyen taya ar hõ̠ ṭaka paesa, ańjo̠m kate monere ma hõ̠ jolpe dho̠ro̠m bạti.
90)Marsalak̕ somaj dho̠ro̠m ńir kate korao kidae ńũt, bachao bonae pap ho̠ṛ kho̠n ho̠ṛ hõ̠ bonae dut.
91)Janam hara let̕ mea kin tino apum ko̠no̠r ko̠no̠r, am do̠ do̠s talre sajao kede banor.
92)Amak̕ chinạr te̠ge̠ ńẽl me bhage leka, apum doko ro̠ṛ kedea te̠he̠ń oka leka.
93)Do̠s talare te̠he̠ń nonḍem sajao kede boka, am haralet̕ me reak̕ cet̕ hoyena ḍhoka.
94)As tãhe kantae tino haire apat jona , o̠lo̠k̕ parhao cet̕ kate arjao anae ṭaka.
95)Biṭi pasec̕ cedae o̠l arjao aleay ṭaka, tãhã o̠l cet̕ kate bae emeda ḍhoka.
96)As tahẽ kan tae uni haire ạḍi leka , te̠he̠ń katha ańjo̠m pema haire jokha jokha.
97)Judi biṭi bo̠ho̠k̕ ḍaṭi do̠s kelase pass, tobe anae hoyok̕ one paesa ṭaka cas.
98)Do̠s kelas pas kedaeye hoyen maraṅ sera , noṅka tege nahak̕ jugbon ḍubao cabaeda.
99)Ma tobe hudis ar gandoṅ mabon juan kuṛi ko̠ṛa, mõ̠j dahar panjae kate somaj bhali abon dela.
100)Abo ge co e juạn somajren dho̠n do̠, cirgạl mone te̠ge̠ tear rakap̕ mabon so̠ro̠s somaj do̠.

 

(1970 serma o̠l sãohet kubi gaona khon  tumạl akana)

Leave A Reply