Raṅpur reak̕ pirgańjre Santal juạn koṛak̕ Ḍragon jo̠ cas

Raṅpur jilạ reak̕ pirgańjre pạhil dhao leka ḍragon cas abad hoyok̕kana. Phonimonsa (kakṭas) jạt reak̕ mit̕ lekan jo̠ kana Ḍragon. Science reak̕ pạrsite noa jo̠ reak̕ ńutum Hylocercus Undatus. Ar niạ upạjilạren pạhil ḍragon casa ho̠ṛ bhogoban atoren University paṛhaoic̕ Santal koṛa Suit Marḍi. Uni juạn koṛa ona upạjilạ reak̕ Chotra Union bhogoban atoren agapit maṛdiren ho̠po̠n kanae. Rajshahi besarkari Barendra universiṭy reak̕ social science mucạt̕ sermaren paṛhaoic̕ koṛa suit marḍiy me̠neda, o̠lo̠k̕ paṛhao mucạt̕kate nukri tayo̠m baṅ ạcurkate apnar jo̠s (luck) bo̠do̠l são são ona atoren kạmi baṅ ńamakan koṛako kạmi reak̕ aphsor tear lạgit̕ mit̕ usrạu enterpriser hoe reak̕ kukmu kho̠nge ḍragon jo̠ cas abade e̠ho̠p̕akada.
Uniak̕ noa kạmire udgạu ar go̠̣ṛo̠e e̠maekana ac̕ren bhạgni jãwãeCustomsren são Commisonar Sontosh Soren. Nukri karonte uni do̠ thailanḍ disạme calaolena. O̠ṇḍe̠ ḍragon reak̕ bagwan ńẽl ạgukate uni ḍragon jo̠ cas lạgit̕ udgạue e̠mkedea. Suit marḍi me̠neda, iń mo̠nsubạń hataokeda ińak̕ oṛak̕ ḍinḍạ aḍepase jumire ḍragon jo̠ cas abad reak̕. 2018 serma nobembor cando 2 lakh ṭaka kho̠ro̠ckate naṭore kho̠n sasaṅ, arak̕, po̠ṇḍ pe jạt reak̕ 1 hajar 2 sae ḍragon kạṭic̕ dare ạgukate bagwan e̠ho̠p̕leda. Noare ṭạṭi e̠m, duạr tear ar niro̠po̠n do̠ho̠ lạgit̕ uniak̕ 5 mõ̠ṛẽ̠ lakh leka ṭaka kho̠ro̠cena. Dare ro̠ho̠e mit̕ cando pon serma tayo̠mge uni jo̠ akhriń e̠ho̠p̕ena.
pạhil serma 400 ṭaka kg damte 17 mon (a measure of unit) jo̠ akhrińkate 2 lakh 76 hajar ṭakae arjaokeda. Markeṭing reak̕ e̠ṭke̠ ṭõ̠ṛẽ̠ chaḍa hõ̠ ko̠rona karonte niạ dhaoge invest reak̕ sanam kạuḍi rakap̕koak̕. Bagwan ńẽl lạgit̕ ho̠ṛ hõ̠ menakoa. Universiṭy chuṭi o̠kte̠ oṛak̕ he̠c̕kate jãhãre somoe baṅ bạric̕kate apnar bagwanre mo̠n o̠kte̠ e̠mo̠k̕a.
Ona chaḍa hõ̠ ac̕ren g̠o̠go̠ baba ona bagwan mõ̠ńjtekin ńẽlak̕. Suite me̠neda, Ḍragon baha he̠c̕ bar cando modre noa reak̕ jo̠ beleak̕. Mit̕ṭe̠n ḍragon jo̠ak̕ bhar 3 sae kho̠n mõ̠ṛẽ̠ sae hoyok̕a. Noa jo̠ do̠ ạḍi sebel ar napae gea ar ho̠ṛmo̠ se̠c̕ lekate ran re̠he̠t̕ lạgit̕ bhagegea. Bele jo̠ Refregaretor do̠ho̠ begor eae irạl mãhã mõ̠ńjge tahẽ̠na. Universiṭy mastersre paṛhao são são kạmi ho̠te̠te̠ apnar jo̠s bo̠do̠l lạgit̕ kurmuṭuan mit̕ usrạu koṛa kanae suit marḍi .

Comments are closed.