Santalkoak̕ DASÃE PO̠RO̠B

Mahadev Hansdaḱ

Dasãe do̠ Guru ar Celakoaḱ diso̠m saṅghar reaḱ po̠ro̠b kana. Sedae do̠ jao serma Ruhni hiloḱ (Jhẽ̠ṭ reaḱ 13 mãhã ) kho̠n guru racare Cela ko duṛuṕkan tahẽ̠na. Guru ṭhen kho̠n Mantar, Jhạṛni, Ban mara, Chalo̠n mara , Naso̠n taṛao eman gun birdạko cet́et́ tahẽ̠na ar ruạ haso reaḱ ran murgạn hõko oromet́kan tahẽ̠na .

Ona tayom dasãe boṅga reaḱ cando moloḱ mõ̠ṛẽ̠ mãhã kho̠n guru ar cela do̠ disom saṅgharko oḍokoḱa .
Kạmru Guru ńutumte guru racare sunum sindurko ãṛgoea. Mit́ kathate guru ar celako do̠ ‘Tantra Shastra’ ko charchaya. Metaḱme Santi, Bosikomo̠ro̠n, Sto̠mbho̠n, Bidweso̠n, Uchato̠n ar Maro̠n birdạko ceda. Santalite men lekhan do̠ Napae kaḱ, Muhnikaḱ , Te̠nkaḱ, Hiskạkaḱ , Bhiṛkikaḱ ar Hanapurikaḱ bujhạuo̠ḱa. Noa bakhrate aema mantar ar ran murgạnko reaḱ katha menaḱakada.

Guru raca reaḱ boṅga sare̠ć sunum sindur do̠ ato-ato, oṛaḱ oṛaḱko idi se̠ṭe̠ra. Jemo̠n sanam ho̠ṛ nae baṛe, napae baṛeko tahe̠n. Mit́ kathate ho̠ṛ boge, disom boge ar dhạrti boge tahẽ̠koḱma. Noage kana dasãe se̠ diso̠m saṅghar reaḱ jo̠s do̠.
Sunum sindur ar Aeno̠m Kajo̠l do̠ boṅgae reaḱ jinis (Samagri) kana. Mit́ gururen cela são ar mit́ gururen celako ńapamlen khan sereńteko e̠pe̠se̠doo̠ḱa. Boṅga sare̠ć sunum sindurko e̠pe̠ma. Ona tayo̠m guru-guru ar cela-celako johar joṅa.

Rev. A. Campbell aḱ katha lekate “Young man who have undergone a short training in medicine, exorcism and divining who go singing and begging during Dasãe Festival.”
Onkage ạḍi ńutuman kho̠ndro̠niạ Rev. P.O. Bodding do̠e lạiakada- “The deciples of an Ojha who have Finished their Course of instruction and during the Durga Puja Walk about begging Indian Corn etc.”
Ona bego̠r, Rev. L.O Skrefsrud aḱ “Ho̠ṛkoren Mare Hapṛamko Reaḱ Katha” (1887), Ramdas Tudu Reska aḱ ” Kherwal Boṅso̠ Dho̠ro̠m Puthi” (1894 ?), Badha Besrawaḱ “Hoṛ Ho̠po̠n” (1978), Durbin Soren aḱ ” Santal Sonskriti” (1985) puthire ar Dhirendranath Baske, Sedae Sirijol, Dr. Jaladhar Karmakar eman
O̠no̠liạkoaḱ o̠lbe̠lre hõ̠ dasãe do̠ guru ar celakoaḱ disom saṅghar kana mente sạbudo̠ḱkana .

Guru era ṭhe̠n cela koaḱ neho̠r do̠ noṅka:-
Loṭa daḱma sepeńkate
Oḍoṅlenme guruma nera ,
Cela koṛawaḱ johar do̠
ataṅ tale̠me .
Ọ Hạri Gosãi ,
Cela koṛawaḱ johar do̠
ataṅtale̠me .

Guruma nerae oḍoṅen
Bhurkại rakaṕen,
Guruma nerae oḍoṅlen
Bhurkại rakaṕen,
Ọ Hạri Gosãi ,
Cela koṛawaḱ johar do̠e ataṅ adera.

De, Sanamko lạgit́ tahẽ̠yena Dasãe reaḱ Johar!

Comments are closed.