Ho̠ṛ Ho̠po̠nkoak̕ Sạgại Le̠g Acar

Tumạlakana

Ho̠ṛ ho̠po̠nko do̠ daman le̠gcar menak̕takoa. Onako modre daman mit̕ le̠gcar do̠ hoyok̕kana ‘Sạgại’. Ho̠ṛ ho̠po̠nko do̠ tis hõ̠ sạgại chaḍa bako ro̠ṛ-landa se̠ ho̠ho̠joṅa. Ho̠ṛ ho̠po̠nak̕ do̠ aso̠l bar leka sạgại menak̕a: Janam sạgại ar bapla to̠no̠l sạgại ona chạḍa hõ̠ ato sạgại menak̕a. O̠ko̠eko sãote janam sạgại ar bapla baṅ jurik̕, onko sãote atore ho̠ho̠joṅ lạgit̕ko sạgạijoṅa judạte. Onage ato sạgại do̠. Ato sạgại hõ̠ ado̠m do̠ janam sạgai lekate ar ado̠m do̠ bapla sạgại lekateko sạgạijoṅa. Ato sạgại do̠ e̠ke̠n beoharjoṅ ar mapanao lạgit̕. Ho̠ṛ ho̠po̠n do̠ ạuṛi tishõ̠ bako ho̠ho̠joṅa. Sạgại menak̕tako lekako ho̠ho̠joṅa. Ho̠ṛ ho̠po̠nak̕ sạgạire do̠ pe lekateko hohojoṅa: Jeleka Am, Aben, ar Ape. Ado̠m sạgạire do̠ mit̕ ho̠ṛ “Am” Me̠nteko ńumkoa. Ar ado̠m sạgạire do̠ mit̕ ho̠ṛge “Aben” ńumok̕a. Ar hõ̠ ado̠m sạgạire do̠ mit̕ ho̠ṛge “Ape” menteko ńumogok̕a.

O̠ko̠eko ho̠ho̠njoṅa ‘ABEN ’ do̠
E̠ke̠n bapla so̠mpo̠k bhitrire ‘aben’ mente do̠ko ho̠ho̠joṅa. Latarre onako do̠ lại saḍeyena.


Noṅkan so̠mpo̠kan ho̠ṛ do̠ ‘Aben’ me̠nteko ho̠ho̠joṅa: jeleka, jãwãe ar hanharte̠t̕ talare do̠ noṅka: “Ma durup̕ben jãwãe”. Ado̠ jãwãe, ce̠t̕ leka menak̕ baṛabena aben do̠?” Ado̠ jãwãe noṅkae ro̠ṛ ruạra: “Hẽ̠ go̠, be̠s baṛagealin ạliń do̠.”
Ar hõ̠ huḍiń boeharen era ar jãwãeren lạṭu boeha modre do̠ noṅka: “Ma maraṅ ti-jạṅga ạbuk hijuk̕ben, thora dak̕ mạnḍiliń loabenge.”
Ado̠ jãwãe dadate̠t̕e ro̠ṛ ruạṛa, “ Hẽ̠ bạhu, ma loeben, usạraliń ạbuk jaṅgak̕kana nãhãk̕.”
Noṅkan so̠mpo̠k̕ren do̠ ako akoko mano̠tok̕a ‘Aben’ ho̠ho̠njoṅte.


O̠ko̠eko ho̠ho̠joṅa ‘Ape’ do̠ ?
Baplawakan ho̠ṛren dene banar eṅga-apa ar onko akoren bokot boeha sudhạ, onko do̠ jo̠to̠ balaya kanko. Ar onko ako motore mit̕ ho̠ṛe ho̠ho̠aere hõ̠ “Ape” geko metaea: jeleka “Tinrepe he̠c̕ena sumdi? Ma note piṇḍa se̠c̕rege jiruạk̕ tabonpe. Henda sumdi, ce̠t̕kope disạ ạgukeda ado̠? Ce̠t̕ko cope ceka baṛaet̕kan nebetar do̠? Abo do̠ oṛakrege jirạu menak̕bona.” Balaya do̠ mano̠tteko soman somangea. Onatege noṅkan do̠ko ho̠ho̠joṅa.


O̠ko̠eko ho̠ho̠joṅa “Am” do̠

Sạgạire o̠ko̠e ‘Am’em ho̠ho̠ae, uni do̠ ac̕ ‘Ińe mena: jeleka “Am do̠ ce̠t̕ leka menama ya?” “Hẽ̠ go̠ṛo̠m ba, iń do̠ be̠s baṛage.”
O̠ko̠e ‘Aben’ em ho̠ho̠ae, uni do̠ ac̕ reaṅ ‘ạlińe mena. Onko do̠ noṅkako galmaraoa: “Henda bạhu, daka utu do̠ben sạtkeda?” “Hẽ̠ go̠, ạliń do̠ daka-utu do̠liń sạtkeda.” Onkage o̠ko̠e ‘Ape’em metaea, uni do̠ ac̕ ac̕ren ‘ale’ se̠ ‘abon’ se̠ ‘aboye’ mena. Onko do̠ noṅkakok galmaraoa: “Ape do sumdi nes do̠ bape se̠nok̕kana?” “Hẽ̠ sumdi, abo do̠ darae candoge se̠nok̕bon goṭawakat̕a.
Ho̠ṛ ho̠po̠nak̕ do̠ aema lekan so̠mpo̠k menak̕a. Ar jo̠to̠ so̠mpo̠kren ho̠ṛge sạgai menak̕takoa. sạgại chaḍa bako ro̠ṛ landea. Onako sạgại do̠ noṅka lekan:
1. So̠mpo̠k: Apat se̠ apat haṛam
Ho̠ho̠joṅ Ạri: Baba, Ạpuń, bapo
2. So̠mpo̠k: Eṅgat
Ho̠ho̠joṅ Ạri: Go̠go̠, go̠, Eṅgań, ayo, nayo
3. So̠mpo̠k: Apatren apat se̠ baba haṛam
Ho̠ho̠joṅ Ạri: Baba, Go̠ṛo̠mba, Haṛam ba, lạṭu baba
4. So̠mpo̠k: Apatren eṅgat se̠ go̠go̠ budhi
Ho̠ho̠joṅ Ạri: Go̠go̠, go̠ṛo̠m, buḍigo, lạṭu go̠go̠
5. So̠mpo̠k: Eṅgatren Apat
Ho̠ho̠joṅ Ạri: Baba, Go̠ṛo̠mba, Haṛam ba, lạṭu baba
6. So̠mpo̠k: Eṅgatren eṅgat
Ho̠ho̠joṅ Ạri: Go̠go̠, buḍigo, go̠ṛo̠m, lạṭu go̠go̠
7. So̠mpo̠k: boeha,
Ho̠ho̠joṅ Ạri: Dada, da, maraṅic̕ se̠ maraṅ, talaic̕ se̠ tala, sạńjhlạic̕ se̠ sạńjhlạ, mạńjhlạic̕ se̠ mạńjhlạ, huḍińic̕ se̠ huḍiń.
8. So̠mpo̠k: apatren boehako
Ho̠ho̠joṅ Ạri: Maraṅba, talaba, sạńjhlạba….
9. So̠mpo̠k: boeharen erako
Ho̠ho̠joṅ Ạri: Maraṅ bạhu, tala bạhu, hili
10. So̠mpo̠k: apatren boehakoren erako
Ho̠ho̠joṅ Ạri: Maraṅ go, tala go, ho̠po̠ngo…
11. So̠mpo̠k: Miserako
Ho̠ho̠joṅ Ạri: Biṭi, mại, maraṅ mại, tala mại…
12. So̠mpo̠k: Miserako jãwãe
Ho̠ho̠joṅ Ạri: jãwãe, ho, teńaṅ (boeha kạṭic̕ge khan)
13. So̠mpo̠k: Koṛa ho̠po̠nko
Ho̠ho̠joṅ Ạri: Beṭa, maraṅic̕, talaic̕, talaic̕, sạńjhlạ
14. So̠mpo̠k: Kuṛi ho̠po̠nko
Ho̠ho̠joṅ Ạri: Biṭi, mại, maraṅ mại, tala mại…
15. So̠mpo̠k: Koṛakoren erako
Ho̠ho̠joṅ Ạri: Bạhu, maraṅ bạhu, tala bạhu…….
16. So̠mpo̠k: Kuṛi ho̠po̠nren jãwãe
Ho̠ho̠joṅ Ạri: jãwãem maraṅ jãwãe, tala jãwãe
17. So̠mpo̠k: lạṭu boeharen bạhu
Ho̠ho̠joṅ Ạri: Hili, bạhu
18. So̠mpo̠k: Lạṭu miseraren jãwãe
Ho̠ho̠joṅ Ạri: Teńań
19. So̠mpo̠k: jãwãeren lạṭu boeha
Ho̠ho̠joṅ Ạri: Ba-hońhar, maraṅ, tala….
20. So̠mpo̠k: Bạhuren lạṭu kuṛi boeha
Ho̠ho̠joṅ Ạri: Ajhnar, dại, maraṅ dại, tala dại….
21. So̠mpo̠k: Lạṭu koṛa boeha
Ho̠ho̠joṅ Ạri: Dada, da
22. So̠mpo̠k: Lạṭu kuṛi boeha
Ho̠ho̠joṅ Ạri: Didi, dại
23. So̠mpo̠k: Eṅgatren koṛa boeha
Ho̠ho̠joṅ Ạri: Mama, mamo
24. So̠mpo̠k: Eṅgat koṛa boeharen bạhu
Ho̠ho̠joṅ Ạri: Mạmi
25. So̠mpo̠k: Apatren koṛa boeha
Ho̠ho̠joṅ Ạri: Maraṅ ba, tala ba, ho̠po̠n ba….
26. So̠mpo̠k: Apatren koṛa boeharen bạhu
Ho̠ho̠joṅ Ạri: Maraṅgo, talago, ho̠po̠ngo…
27. So̠mpo̠k: Apatren kuṛi boeha
Ho̠ho̠joṅ Ạri: Nana, Hatom
28. So̠mpo̠k: Apatren kuṛi boehako jãwãe
Ho̠ho̠joṅ Ạri:Kumạṅ
29. So̠mpo̠k: Kuṛien Kạṭic̕ koṛako
Ho̠ho̠joṅ Ạri: Bạbu, go̠ṛo̠m
30. So̠mpo̠k: Kuṛien Kạṭic̕ kuṛiko
Ho̠ho̠joṅ Ạri: Mại, Go̠ṛo̠m
31. So̠mpo̠k: Eṅgatren dosar jãwãe
Ho̠ho̠joṅ Ạri: Kakababa, baba
32. Apatren dosar bạhu se̠ era
Ho̠ho̠joṅ Ạri: Kạki go̠go̠, kạkigo,
33. So̠mpo̠k: Pạhil era se̠ oṛak̕ ho̠ṛ
Ho̠ho̠joṅ Ạri: Bạṭki
34. So̠mpo̠k: Dosar era se̠ oṛak̕ ho̠ṛ
Ho̠ho̠joṅ Ạri: Chuṭki
35. So̠mpo̠k: Ạjijte̠t̕ (Lạṭu kuṛi boeha)
Ho̠ho̠joṅ Ạri: Dại, didi
36. So̠mpo̠k: Lạṭu miseraren jãwãe
Ho̠ho̠joṅ Ạri: Teńaṅ
37. So̠mpo̠k: boeha (ajhnar) Erwelte̠t̕ (Bạhu se jãwãeren)
Ho̠ho̠joṅ Ạri: Dại, didi
38. So̠mpo̠k: Kạṭic̕ koṛa se̠ kuṛi
Ho̠ho̠joṅ Ạri: Ho, na, maraṅ, tala…..
39. So̠mpo̠k: Bokot (bokot koṛa, bokot kuṛi, bokot jãwãe, bokot bạhu) Koṛaren hońhar-hanhar se̠ balayako)
Ho̠ho̠joṅ Ạri: Sumdi, boeha (baba ho̠ṛko), gate (ayo ho̠ṛko), Kaṛamḍar (ayo ho̠ṛko)




Comments are closed.