Ko̠rona jiwi piliń o̠kte̠re Ạdibạsi ko̠ṛa kuṛikoak̕ o̠lo̠k̕ paṛhao reak̕ halat

 

Ko̠rona bhaeras iạte goṭa dhạrtire sanam lekan ho̠ṛkoak̕ jiwi jạtire aema lekan bodol hec̕aakana. ko̠rona bhaeras reak̕ umul Baṅladisạm são goṭa dhạrti sikhnạt bebostare chaṭa paraoakana. Ạdibạsi o̠lo̠k̕ ko̠ṛa kuṛi hõ̠ noa barhe bạnuk̕koa.
Ar noa reak̕ umul judạ judạ jạt leka ạdibạsi jạtko cetan hõ̠ aema lekate ńurakana. Noa o̠kte̠ iskul, kolej, universiṭi ạḍi mãhã kho̠n bond menak̕a. O̠lo̠k̕ paṛhao sikhạt pratisṭhan bond tahẽ̠ karonte o̠lo̠k̕ paṛhao gidrạko oṛak̕ tahẽ̠kate apnarak̕ dinko khemaoeda.
Ko̠rona bhaeras karonte sikhnạt pratisṭhan kulup̕ o̠kte̠ reak̕ pạhil kho̠nge paṛhao puthi são oṅkoak̕ sombond bại bại pharak̕ok̕kana. Nahak̕ ńelok̕kana puthi são oṅkoak̕ sombond ar bạnuk̕a. O̠lo̠k̕ paṛhao cetan hõ̠ oṅko go̠ro̠jko at̕ utạreda. Go̠go̠ babako gidrạkoak̕ o̠lo̠k̕ paṛhao cetan jãhãn jạruṛ najar bako emeda. Oṅko hõ̠ akoren gidrạko o̠lo̠k̕ paṛhao lạgit̕̕ bako jo̠bo̠rjosekoa. Onate sikhạnt gidrạko o̠lo̠k̕ paṛhao kho̠n judạ sec̕ ghańjerok̕kana. Sikhnạt pratisṭhan bond tahẽ̠ iạte aema gidrạko paṛhao kho̠n saṅgiń sec̕ko calak̕kana. Kilạs reak̕ jãhãn bhabna se bhar tahẽ̠ iạte gharońj reak̕ jạruṛ lạgit̕ go̠go̠ baba são nalha tumạl kạmiko calak̕kana ar judạ judạ kạmikore hõ̠ko jopraok̕kana. Noa karonte oṅko kạuḍi arjao sec̕ko lahakana ar paṛhao cetan go̠ro̠j adok̕kana.Ona chaḍa hõ̠ aema ạdibạsi o̠lo̠k̕ paṛhao ko̠ṛa kuṛi hạnḍi pạurạ ńũreko jobekana. Se̠ aema o̠lo̠k̕ paṛhao gidrạko kạṭic̕ umạr reko bapla reak̕ kạmi hõ̠ ńelok̕kana.
O̠lo̠k̕ paṛhao cetan gidrạkoak̕ go̠ro̠j dohoe lạgit̕ sarkar aema lekate kurmuṭueda. Je̠le̠ka Ṭelevison ar online kilạs, oka lekate gidrạko o̠lo̠k̕ paṛhao sec̕ go̠ro̠jko sap̕ dohoe daṛeak̕. Menkhan ạdibạsi sikhạnt gidrạko noa aphsor bako hatao daṛeak̕kana. Gharońj reak̕ aema ‍ samajik-orthonoitik (Economical-Social) karonte oṅko do̠ sarkarak̕ noa bhage kurmuṭure bako selet̕ daṛeak̕kana. Karon okoe okoe oṛak̕ re Ṭelevison bạnuk, Anḍroiḍ phone bạnuk̕a, Anḍroiḍ phone Mobile phone tahẽ̠lenkhan hõ̠ Internate pakaje kiriń reak̕ daṛe bạnuk̕a noṅkana aema lekan eṭkeṭõ̠ṛẽ̠ menak̕a. Sor din Baṅladisạm reak̕ NGOak̕ mit̕ tolas (research) lekate baḍaeok̕kana Soṅsad Ṭelevison kho̠n porcarakan kilạsre 75% o̠lo̠k̕ paṛhao ạdibạsi gidrạko bako se̠le̠t̕ daṛeak̕kana.
Besarkari noa NGO reak̕ tolas kho̠bo̠r lekate baḍaeok̕kana, Disạmre noa botoran ko̠rona ruạ o̠kte̠re Saṅsad Ṭelevison kho̠n porcarakan paṛahoakana kilạsre aema o̠lo̠k̕ paṛhao gidrạkoak̕ go̠ro̠j bạnuk̕a. 56% bhag gidrạko noa kilạsre bako se̠le̠t̕ok̕kana.Jo̠to̠ kho̠n jạsti 75% bhag ạdibạsi o̠lo̠k̕ paṛhao ko̠ṛa kuṛiko Saṅsad Ṭelevisonak̕ porcarakan kilạsre bako se̠le̠t̕ daṛeak̕kana. Noa tayo̠m menak̕koa Madrasa, ato disạm, hanḍicap gidrạko.Oṅko cedak̕ kilạsre bako se̠le̠t̕ daṛeak̕kana noa renak̕ ro̠ṛ ruạṛre oṅko meneda, 71% bhag o̠lo̠k̕ paṛhao ko̠ṛa kuṛi akoak̕ aema lekan eṭketõ̠ṛẽ̠ak̕ kathako lại jạhirkada. Noako modre menak̕a, Jãhãeak̕ oṛak̕re Ṭelevison bạnuk̕a, arhõ̠ jãhãeak̕ oṛak̕re Bijli (Electricity) bạnuk̕a. Arhõ̠ jãhãe jãhãe oṛak̕re Cable line bạnuk̕a. Ar noako eṭkeṭõ̠ṛẽ̠ karonte aema gidrạ Ṭelevison kilạs reak̕ barhe menakoa. Ar ṭelevison kilạsre okoe paṛhao gidrạko se̠le̠t̕ok̕kana onko modre 64% bhag gidrạko lạieda, noako kilạs oṅkoak̕ kạmire baṅ hijuk̕kana.
Ko̠rona bhaeras (Cov-19) karonte ạdibạsikoak̕ sikhnạt aṛere aema lekan bạric̕ umul parakana. Noṅkana ạḍi hudisok̕kana, ko̠rona tayo̠m mõ̠j o̠kte̠ hec̕lenre hõ̠ aema ạdibạsi gidrạ o̠lo̠k̕ paṛhao kho̠nko topa calak̕a. Ar noṅkate ar mit̕ dhao ạdibạsi gidrạko o̠lo̠k̕ paṛhao kho̠n tayo̠mok̕kana.

Comments are closed.