Santal Hul Dinisạ Manao Pạhil ce̠t̕ lekate hec̕ lena ?

Tonol Murmu

Briṭish raj reak̕ sakamko ar briṭis rajre kusiakana nagam o̠no̠liako hotete Santal Hul babod o̠l tahẽ̠lena. India sub-continent re Hul reak̕ disạ uihạr katha sadharon horkoak̕ onotor at̕ cabalena. Ona chaḍa hõ̠ Bharot, Pạkistan, Baṅladisạmak̕ sarkari paṛhao puthikore Santal Hul Babod o̠l do̠ baṅ tahẽlena. Sarkari puthiokare o̠l tahẽ̠lena Sipạhi Hul ge Briṭish raj birudre pạhil bharot sạdhin hul. Maraṅ Santal Hul renak̕ katha sarkari puthikore o̠lge baṅ tahẽlena. Baṅladisạm rehõ̠ nahak̕ hõ̠ sarkari puthikore santal Hul babob gạhir macha baḍaeleka o̠lge bạnuk̕a. Ar Siphai Hulge pạhil hul mente o̠lakana.

Nagam lekate baḍaeok̕kana Bharot disạmre 30 june do̠ Jạtiạri Ranajoṭ Mãhã ar 7 julae tạrikh do̠ Hul Dinisạ Mãhã hisạbte manao hoe hijuk̕kana. Menkhan Pạchim Dinạpur reak̕ Adibạsi do̠l ‘Adibạsi Mohasabha’ 1955 se̠rma (Okoeko menak̕ 1956 se̠rma) reak̕ 30 june tạrikh Santal Hul reak̕ Mit̕ sae se̠rma disạkate ‘Jạtiạri Ranajoṭ Mãhãko’ manaoleda pạhil dhao leka. Ar noa Hul Dinisạ Mãhã manao hoelena nahak̕ Dạkhin Dinạjpur reak̕ kumargańj thanare menak̕ Beltora ato baṛe dare latar maṭhre. Noa ńutum dohoe renak̕ mit̕ karo̠n tahẽ̠lena 30 june Briṭis raj, onkoren cela mohajon, darogak̕ saset-koclon birudre jumid renak̕ ekraṛ din. Menkhan Hul reak̕ se̠ṅge̠l pasnao reak̕ aso̠l din tahẽ̠lena 1855 se̠rma reak̕ 7 julae. 1855 se̠rma reak̕ 30 june barhait sorre menak̕ Bhognaḍihi maṭhre 10,000 (adomko menak̕ 30,000) santal jaroakate jumid renako kiriạleda, ekraṛledako apnarak̕ ato re apnarak̕ raj tear rakap̕ lạgit̕. Asol ghạtạna lekate 1855 se̠rma reak̕ 7 julae Barhait reak̕ sorre paṭhkaṭhiae baṛe dare butạ kho̠n briṭish rajren asul cela ar mahajon kenaram bhagat ar saset̕ic̕ daroga moheslal daroga goc̕ hotete.
Niạ mit̕ sae hul se̠rma manao sasapṛaoic̕ko tahẽ̠lena namḍak̕ santal mukhiạ Debi Soren ar manotan Nathaniel Murmu. Ona se̠rma kho̠n jao se̠rma pạchim dinạjpurre 30 june manao hoyok̕kan tahẽ̠na. Bại bạite judạ judạ ilạka ar rajjyare santal se̠ adibạsiko noa mãhãko manao e̠ho̠p̕ena.
1978 se̠rma kho̠n Nathaniel Babu ar Mahasoe (Professor) Amio kiskuak̕ ạyurte ‘The Santali Literary and Cultural Society’ak̕ kurmuṭu hotete pạchim baṅla reak̕ raj nagraha kolkatare noa hul mãhã manao e̠ho̠p̕lenkhan ona mãhã manao reak̕ jạrụtet̕ bại bạite baṅla kho̠bo̠r kagojre hec̕ e̠ho̠p̕ena. Ar hoṛkoak̕ baḍae hõ̠ jạsti idiena.
Noa mudre 1968 se̠rma Mohamod Sahidullahak̕ kurmuṭute bharot disạm reak̕ rajạri komunisṭ do̠l reak̕ gonophronṭ ‘Bhartiạ Krisok Sabha’ ona mãhã Sãotal Bidrạ Dibos ńutumte manaoko e̠ho̠p̕ena. Tayomte komunisṭkoak̕ jumid do̠l Bam Phronṭ pạchim baṅla reak̕ rajạridaṛe hec̕lena, ona do̠l ren asol mukhiạ tahẽlena Jyoti Bosu. Uni do̠ ac̕ laharen Bam phoronṭren mukhiạkoak̕ emakan ̠ńutumge sarkari onusṭhanre beohar renak̕e monsubạkeda. Judi hõ̠ ona mãhã reak̕ ńutum thora bodol kate ‘Sãotal Hul Dibos’ Tayo̠mte arhõ̠ bodol kate ‘Hul Dibos’ ńutuman muthạnre hec̕ena. Ar pạchim bạṅla sarkarak̕ ḍahar pańjakatege Bihar, uddisa, ar jharkhanḍ rajkoren sarkar hõ̠ ona Hul Dibos mente manaoko e̠ho̠p̕ena. khạli Assam rajjyare se̠ Baṅladisạmre hõ̠ noa dibos do̠ sarkari ạri lekate bako manaoa.
Noa kho̠n baḍaeok̕kana pạhil santalkoak̕ do̠l Adibasi Mohasabha noa din manao reak̕ mõ̠j ńútumko emlen rehõ̠ pạchim baṅla reak̕ sarkari porcar hạtiạr (Media) sãote ona ńutum bae pasnao do̠ daṛelena. Ona iạte ńutum babod nagam (itihãs) reak̕ thora bạṛic̕ bodol hoeakana. Judi hõ̠ bharot disạm aema santal do̠l pạhil ńutumte nit hõ̠ noako manao ạgueda.

Comments are closed.