ko̠ro̠na bhaeras iạte bharot disạmre bar ge̠l mit̕ mãhã lạgit̕ siń po̠ṭo̠m calak̕kana

Bharot disạmre ko̠ro̠na bhaeras ruạte ucạrakan ho̠ṛkoak̕ lekha ge̠l sae turui kho̠n jạsti paromakana. Teheń hạbic̕ turui ge̠l eae ho̠ṛak̕ ho̠ṛmo̠re noa ruạ ucạrakana. Ona iạte sarker goṭa disạmre pe̠ hapta lạgit̕ oṛak̕ siń po̠ṭo̠m tahẽ̠ lạgit̕ hukume jạrikeda. Daraekan mo̠ṅgo̠l bar 14 April,2020 tạrik̕ hạbic̕ noa oṛak̕ siń po̠ṭo̠m obosta tahẽ̠na. Niạ o̠kte disạmren jãhãe ho̠ṛ oṛak̕ bahre bae calao daṛeak̕a.

Ge̠l mit̕ din ạḍi jiliń m̃ahã kana, me̠nkhan oṛak̕ siń po̠ṭo̠m baṅ manao lenkhan disạm bar ge̠l mit̕ din lạgit̕ taenomo̠k̕ae mente disạm ak̕yuric̕ Mn. Norendra Modíe menkeda. Unie meneda, “Disạmren aso̠l ak̕yuric̕ hisạbte do̠ baṅ, aperen ghãrõ̠ńjren mit̕ rạiạsi hisạbte noań ńe̠hõ̠re̠t̕pea. Noa iạte thoṛa din bagre reak̕ jivi hiṛińkak̕pe.

Ko̠ro̠na karo̠nte disạm reak̕ aema rajjyare oṛak̕ siń po̠ṭo̠m kate tahẽ̠ reak̕ hukumko jạriakada. Karphiu hõ̠ jạri hoeakana. Noṅka leka obostare disạmren kendrio kạuḍi montri Mn. Nirmola Sitaromon arjao to̠lo̠b (Income tax) jimạ reak̕ okte, noa chada hõ̠ jãhã lekan jạsti kạuḍi baṅ e̠m kate jãhã Bank kho̠n ATMte kạuḍi rakap̕ lạgit̕ niạmạriko algạuakada. Noa obosta po̠rho̠ ńam lạgit̕ ge̠l mõ̠ṛẽ̠ hajar koṭi kạuḍi reak̕ pakage jạriakada. Noa kạuḍite isolation warḍ, ICU ar bhenṭilaṭorak̕ no̠mbo̠r jạsti hoyok̕a. Noa din Mn. Norendra Modi arhõ̠e menkeda; Ḍakto̠rak̕ so̠lha bego̠r jãhãe ran alobon jo̠mma. Niạ okte jãhã lekan eṛe katha ar andha pạtiạukore lutur alope e̠mak̕.  Khạli kendra ar rajjya sarkarak̕ hukum manao idiepe.

Niạ o̠kte̠ rajjya sarker ho̠ṛmo̠ ruạ babod ran ar sewa e̠mok̕ lạgit̕ jạsti najar e̠ma.

Ape ṭhe̠n kho̠bo̠r kagocren kạmiạko kho̠bo̠rko so̠ho̠r se̠ṭe̠reda. Ghãrõ̠ńjren ho̠ṛ bạgi kate polisko ḍaharre pheḍ kate ho̠ṛ lạgit̕ko kạmieda. Apeak̕ raṅgao, aema lekan kathako sahaoeda. Onkoak̕ katha thoṛa hudispe.

Okoe jivi alaekateko kạmieda, jeleka ḍakṭor, nurse, parameḍikal kạmiạko, haspatal kạmiạko ambulance gạḍi cak̕laoko sanam lạgit̕bon bintiea.

Chine, Russia, Itali disạmko reak̕ ho̠ṛmo̠ sewa be̠bosta ạḍi mõ̠ńj hoelenrehõ̠ noa bhaeras são lạṛhạire bako daṛeoakana. Noa obostare ce̠t̕ upại? O̠ko̠eko ko̠rona bhaeras kho̠nko sambhṛaoakanko ṭhe̠n sikhnạt hatao jạruṛa. Onakoak̕ disạmkore sarkar kathate bhaeras sambṛao lạgit̕ oṛak̕ kho̠n bahre bako oḍoṅok̕kana. Abo hõ̠ ona manao idi lagapabona.

Thoṛa ho̠ṛko hudiseda je noa ruạ do̠ samajik saṅgiń tahẽ̠nkan ho̠ṛ lạgit̕ge. Noa do̠ bhul gea. Sanam ghãr̠̃ońj lạgit̕ noa samajik pharak̕ do̠ho̠e do̠ jivi bańcao lạgit̕ ạḍige jạruṛa.

O̠ko̠e sapha kạmire joṛao menak̕koa, onko lạgit̕ hõ̠bon bintieak̕.

Re̠nge̠c̕ nacar ho̠ṛ gõ̠ṛõ̠ lạgit̕ aema ho̠ṛgeko laha hijuk̕a.

Noa ruạre paṛaoakan ho̠ṛ pạhilre ńe̠lkate jãhãge bae oporom daṛeak̕a. Onate oṛak̕rege tahẽ̠ntabonpe. Jãhãe ḍaharre alope oḍoṅok̕a.

Thoṛa ho̠ṛkoak̕ bhul monsubạ iạte aema ho̠ṛak̕ jivire muhime ạgu daṛeak̕a.

Ko̠ro̠na bhaeras kho̠n bańcao reak̕ jãhãn upại bạnuka. Noa lạgit̕ samajik so̠mbo̠nd kho̠n saṅgińre tahẽ̠n lagaok̕a.

Goṭa dhạrtire mit̕ lakh ho̠ṛ ruạre pạrao lạgit̕ turui ge̠l turui mãhã lagaolena. Inạ ge̠l mit̕ mãhã tayo̠m noa no̠mbo̠r bar lakhre hẹc̕ena.

Ko̠ro̠na ruạ marao lạgit̕ kendrio ar rajjya sarkere kạmieda. Ape jo̠to̠ko bhạlại sewape ńam lạgit̕ sanamko miljul kateko kạmieda.  Bharot disạm noṅka leka obostare paṛaoakan, oka obostare aboak̕ mo̠n o̠nto̠r bạpuric̕ do̠h̠oe jạruṛa. Jivi bańcaolenkhan disạm hõ̠ bańcaoak̕a.

Comments are closed, but trackbacks and pingbacks are open.