Ghãrońj ar somaj re maejiukoak̕ ṭhạ̃i

0

Noa prithimire eṭak̕ eṭak̕ko sirjạu são sãote manwako hõ̠ sirjạu ocokana. Manwa mente e̠ke̠n he̠re̠n ho̠po̠n moto do̠ baṅ menak̕ un sãote maejiu hõ̠e sirjạu ocoena. Unkin do̠ dhạrtitekin ṭunḍạṅa ar bana ho̠ṛ ge somantekin paska ạsulok̕a mentegekin sirjạuocoakana. Nagam reak̕ jạṛ lekate teheń hạbic̕te manwako aemabon ḍherena ar ḍherok̕tege menak̕bona. Manwako talare aema hạṭińena ar jo̠to̠ jạtokge akoak̕ apnar apnar jạt ạḍi damanak̕ jạtkana menteko aṅgoc̕keda. Ar jo̠to̠ jạtkoge akoak̕ pạrsi, haro̠p, sikhạuna, oṛak̕-duạr, jom-ńu, horok̕ bande, dhon-sompod, ạricạli, e̠ne̠c̕ sereń niạmạri, bicạr acar, ar emanteak̕ko lahanti lạgit̕ herel maejiu somanteko khaṭaok̕kana. Noṅkate jạt reak̕ bhage cinhạ uduk̕ daṛeak̕kana. Onako lạgit̕ bhage ar mońj monsubạ menkate bhage kạmiko so̠do̠r daṛeak̕kana.
Abo santal jạt hõ̠co onka lekan purạu mit̕ṭen jạt kanabo e̠nte̠ aboak̕ hõ̠co onkoak̕ leka jo̠to̠ak̕ menak̕tabon. Abo hõ̠co herel maejiu somante mońj monsubạ doho kate bhage kạmi uduk̕te eṭak̕ko ṭhen jạt reak̕ bhage cinhạ uduk̕ daṛeak̕. Menkhan teheń aboak̕ eṭak̕ jạtko ạḍi ̣chiạk̕ko ro̠ṛeda. Aboak̕ kạmi gunạk̕te eṭak̕ko ṭhen kạṭic̕gebon lekhakana. Ona reak̕ maraṅ karon do̠ hoyok̕kana somaj kạmire maejiuko somante babon se̠le̠t̕ ocokokana. Onate santal maejiukoak̕ ạḍi bạṛic̕ obostha ńelok̕kana. Oka oka sec̕ bạṛic̕ obostha menak̕takoa onakoge tumạlkateń o̠lapanteyeda.

1.Janam: Janam kho̠nge kuṛi ho̠po̠era cetanre gharońj ar somajrenko ṭera ṭerako beṅgeda. Kuṛi ho̠po̠n haṛa buṛuko do̠ ạḍi algagea, e̠nte̠t̕ onko lạgit̕ ḍher baṅ kho̠ro̠cok̕a, bako dandok̕a, dho̠n sompod hõ̠ ramo ramo bako doho jogaoeda, onate uniak̕ mon ạtruńok̕kantaya, e̠nte̠c̕ bujhạueda apat oṛak̕rei janamakanre hõ̠ ac̕ lạgit̕ jo̠to̠ak̕ge bạnuk̕a. Ar somajre? Somajre uni dore cele hõ̠ baṅkana. Uniak̕ cet̕ dam hõ̠ bạnuk̕taeae, noa katha do̠ ạkil hạbic̕ ro̠ṛ ańjom lagaoeakana. Nui do̠ somaj reak̕ kạmire cet̕ hõ̠ bae lagak̕a. Kuṛi ho̠po̠nak̕ jonom ạuriknak̕gea. Noate uni kuṛi do̠ jo̠to̠ jingi noa kathae hudis joṅkana ar mon onotor do̠ nijorok̕kantea.
Ińak̕ bujhre kuṛi ho̠po̠n lạgit̕ hõ̠ mit̕ṭen napae monsubạ ar mońj hudis dohoe do̠ ekalte jạruṛge. Unibon gasao mańjao lekan uni ṭhen kho̠n aema bhage kạmibon ńam daṛeak̕ onkan cet̕ adom o̠kte̠ do̠ baba ho̠ṛ kho̠n hõ̠ mońj soros kạmie uduk̕ daṛeak̕. Uni doe purạu manwa kana, bud ạkil hõ̠ menak̕taea. Kạmi reak̕ mońj hore ńam lekhan aema bhage kạmirei ńir laha daṛeak̕.

2. Jumi: Baba go̠go̠ren janam ho̠po̠n lekate ko̠ṛa ar kuṛi ho̠po̠n bana ho̠ṛge soman soman babawak̕ jumi ńam reak̕ katha. Menkhan kuṛi ho̠po̠nak̕ ńamok̕ ho̠ṛ do̠ ạḍi sedaeregeko bondoakada, jemmon ńamok̕ reak̕ katha do̠ tisre hõ̠ aloko ro̠ṛ rakap̕ daṛeak̕. Uni do̠ noate bujhạu daṛeak̕kana je janam babak̕ mẽt̕ ar bicạr do̠ ac̕ lạgit̕ judạgea. Babbaren ho̠po̠nkanre hõ̠ uniren jãhãn oṅsider baṅkana mit̕ṭen eṭagic̕e baṅkanalekae bikạuk̕kana. Noate hõ̠ uniak̕ mon asketok̕kantea ar dulạṛ hõ̠ rạalok̕kantea.
Noa babotte ińdo noṅkan menocoeda. Baba do̠ ac̕ak̕ sompod okoe tinạk̕e emakoa ona lạgit̕ doe sạdhingea. Ona lạgit̕ judạ ạn do̠ baṅ lagaoaea. Ekal jumige emok̕ lagaok̕a? Ona bodolte jãhãnak̕ hoe emdaṛeak̕a. Eṭak̕ jạtko do̠ ṭaka cukti kate ho̠po̠nrerako emakokana. Iń do̠ ona do̠ baṅ meneda mendạń babak̕ nasenak̕ oṅso reak̕ nạmuna jemon ac̕ ṭhen tahẽna. Mit̕ṭen jinis e̠ke̠n kuṛi ho̠po̠ngeko aṭkar daṛeak̕ metak̕me babak̕ oṅso nasenak̕ rehõ̠ ac̕ lạgit̕ ạḍi lạṭu babak̕ ạsirbadkana mente hudiseda. Noṅkate hudisok̕kana uni hõ̠ onkoren mit̕ ho̠ṛ kangea. Noa do̠ sạri katha kana okoeak̕ ce̠t̕ hõ̠ bạnuk̕taea uni do̠ okoe hõ̠ bako ńel ṭhikia ar dam hõ̠ bako emaea. Ar sạrige noṅkate kuṛi ho̠po̠n ac̕ak̕ dam menak̕te mentei hudisjoṅa ar dilgạriạ hoyok̕a.

3. Bapla: Abo santal ho̠ṛ do̠ gharońjrenko ar somajrenko hõ̠ kuṛi ho̠ṛak̕ umạrgeko koyok̕ hora usạrate bapla lạgit̕. Jo̠to̠ ho̠ṛ noa kathabon ro̠ṛeda kuṛi ho̠ṛ oṛak̕ kho̠nem oḍok̕ daṛelenkhan bohok̕ do̠ rawalok̕a. Noate bujhạuk̕kana kuṛi ho̠po̠n do̠ baba gogo ar boehare ạḍi hamal bhar kangea. Baplakate jãwãe oṛak̕re ạsulok̕ reak̕ma baṅ bebosthawakawada, jãhãlekate baplakadea cekateko ạsulea ona do̠ onkoko baḍaea. Noa cintạ kho̠n baba go̠go̠dokin sapha utạrena.
Kuṛi ho̠po̠n do̠ bapla katere hõ̠ jãwãe oṛak̕ ac̕ak̕ oṛak̕ do̠ baṅkana ar onḍenak̕ jinisko hõ̠ ac̕ak̕ oṛak̕ do̠ baṅkana ar bae ạiḍari daṛeak̕. Tinạk̕ din jive̠t̕ tahẽna unạk̕ din masṛa leka kạmikate ạsulok̕ lagaoea. Uni do̠ onḍe goṭa jinige khemao lagaoea ar gujuk̕ hạbic̕ e̠ke̠n tige̠ye̠ tahẽna metak̕me e̠ke̠n ṭaka paesa se dho̠n dạulạt do̠ baṅ, gharońj cak̕lao lạgit̕ emanteak̕ bhage sikhnạt kạmi reak̕ aphsor hõ̠ bạnuk̕taea. Uni do̠n ḍaṅra lekae khaṭak̕re hõ̠ okoe hõ̠ bako saṛhaoea. Baplakate uni kuṛi do̠ ar hõ̠e eskarena e̠nte̠t̕ ac̕ak̕ eṭkeṭõ̠ṛẽ̠ okoe hõ̠ bako bạsutak̕kana. Ar somaj reak̕ katha ańjom se ro̠ṛoṛ do̠ ekaltege baṅ ganok̕taea. Onatei hudisjoṅkana ac̕ do̠ somaj ar gharońjren cele hõ̠e baṅkana. Jãhãtis jãhãge rạnḍilenkhan ona oṛak̕ kho̠nko laga oḍokea.
Baplakate mit̕ṭen kuṛi do̠ ạḍi lạṭu dayikrec̕ boloena. Uni doe bạhukana. Bạhu hisạbte uniak̕ man manot ar dam emae lagaoea. Uni doe go̠go̠kana, go̠go̠ak̕ dam do̠ lạṭgeam uni do̠ gharońh reak̕ jo̠to̠ lekanak̕ kạmieda metak̕me samṛaoeda e̠nḍe̠khan bebosthaic̕ kanae. Oṛak̕re jo̠to̠ ho̠rak̕ suk dukhe ńeleda, dinạm dakatei emakokana uni doe sek̕ạaic̕ kana. Mẽt̕ marsal tahẽntaekhan ac̕ren gidrạko hõ̠ paṛhaok̕e cet̕akokana e̠nte̠t̕e didimoni hõ̠ kanae. Umạr ghaṭao lenkhan jo̠to̠ ho̠ṛ bhage solho emakokana. Uni do̠ jãwãe oṛak̕ do̠ apnar oṛak̕gei hudiseda. Bhabna reak̕ katha umạr ghaṭaokatere hõ̠ aema ho̠ṛ e̠ke̠n tiko laga oḍoket̕koa. Ato reak̕ jãhãn po̠ro̠b se onusṭhan hoyok̕ onare ayo ho̠ṛ bako lahalen khan napaete, onako kạmi baṅ paromk̕a. Onateń menocoeda jãhãege nui ayo ho̠ṛ bae bạsutaekhan ar hoṛmo mon banar sec̕te saset̕e khan enḍekhan uni do̠ marańe ghạt se papeda.

4.Sikhnạt: Manwa jionre sikhạnt do̠ bisi jaṅ kana jo̠t̠o jạtrenge noa damanak̕ katha doko baḍae arko pạtiuk̕kana. Jo̠to̠ ho̠ṛ noa katha purạu lạgit̕ apan apin daṛeak̕lekako ńir lahak̕kana. Menkhan abo santalko do̠ noa katha reak̕ ros sebel soṛom babon aṭkarkat̕te babon lahak̕kana. Ayo baba bana ho̠ṛ somante bạkin sikhạntlenkhan jạti do̠ bae teṅgo keṭec̕ daṛeak̕. Ar noa hõ̠bon baḍaegea sikhnạt do̠ manwak̕ maraṅ ạidạrikana. Noa kathare hõ̠bon laha tayonlenkhan porho baṅ hoyok̕a.
Nahak̕ jug jo̠to̠ ho̠ṛge nase baṅ thoragan do̠ ńutum o̠lo̠k̕ paṛhao lekadobon cet̕ocoet̕kogea kuṛi ho̠po̠nko hõ̠. Kuṛi ho̠po̠n do̠ ac̕ak̕ kusi leka sikhnạt do̠ bae ńam e̠nte̠t̕ baba go̠go̠ tinạk̕A hạbic̕kin goṭaakat̕ inạk̕ hạbic̕ge sen daṛak̕. Gharońj ar somajre nit hõ̠ noṅkana cintạ menak̕ kuṛi ho̠po̠n do̠ eṭak̕ oṛak̕e calak̕a inạk̕gan cet̕tege ac̕ak̕ gharońje calao daṛeak̕. Do̠sar katha do̠ noage onko do̠ cet̕ hõ̠ bako ceka daṛeak̕ onko hõ̠ cetannre jo̠to̠ lekan niros mn so̠do̠rok̕kana arbon ańjomkokana iạtege teheń kuṛi ho̠po̠nak̕ sikhnạt sec̕te ạḍi laṅga obosta ńelok̕kana. Atharege paṛha kecet̕lenkhan ar emanteak̕ sikhnạt kho̠nem eṛanlenkhan noa kho̠n hõ̠ ḍher laṅga obostha hoyok̕.
Aboak̕ mẽta nahak̕ jugre okabon ńelet̕ gharońj kho̠n e̠ho̠p̕kate dhạrti reak̕ jo̠to̠ lekanak̕ kạmi ayo ho̠ṛko kạmikana. Onko kạmi begor sikhnạt do̠ baṅ purạuk̕kana. Gharońjre paṛhaok̕ kuṛie tahẽlenkhan jo̠to̠ lekanak̕e kạmi daṛeak̕. Oṛak̕ duạr sapha, sajao, potao, daka-utu, gidrạ paṛhao, ruạk̕ ho̠ṛ jo̠to̠kko, ganok̕ ar sạrin sikhnạt emanko saãote eṭak̕ kạmikoe puṛau daṛeak̕kana metak̕me gharońj reak̕ muthạnge bodolok̕a.
Lạṭu lạṭu ạkilan ho̠ṛko do̠ ayo ho̠ṛ cetanre ạḍi daman kathako ro̠ṛakada jemon, “Iń mit̕ṭen sikhạnt go̠go̠ imạńpe ape mit̕ṭen sikhạnt jạtiń emapea-Nepolian. Noa kathate bujhạuk̕kana e̠ke̠n sikhnạt go̠go̠ ho̠ṛge jạti somaj benao rakap̕ daṛeak̕. Jo̠to̠ lekanak̕ kạmigei purạu daṛeak̕. Sikhnạt reak̕ aphsore ńamlenkhan abo santal kuṛi hõ̠ ḍaktar, nạrs, ṭicạr, ukil, pulis, enjinier, ḍaibor, pailoṭ, o̠lo̠k̕ko, sereńic̕ silpi, kheroal ar aema lekan ạphiskoren ạphisarko hõ̠ko hoe daṛeak̕. Asol katha do̠ noage mit̕ṭen do do hikmat (skill) benao lạgit̕ do̠ uni cetanre bhage cintạ ar mońj monsubạ dohoe lagak̕a.
Santal ayo ho̠tṛko akoak̕ kạmi hõ̠ bako kạmi daṛeak̕ mente unạk̕ nijor manoạa doko baṅkana, abobon baḍaegea onko doko asol kạrigol kana. Onkoak̕ noa sorol aphsor do̠ ḍher gaharońj ar somaje beohareda metak̕me uni ayo ho̠ṛ bae beoharocok̕e kana. Mit̕ṭen katha baṅ ro̠ṛlenkha baṅ hoyok̕kana. Santal ho̠po̠nak̕ ạḍi lạṭu ar ạḍi damana̕ gunko menak̕takoa, ona gunko do̠ noakoge-
1. Santalko e̠ṛe̠ katha bako ro̠ṛa
2. Santalko ko̠m bhar bako emok̕a
3. Santalko bako kombṛoea
4. Santalko khạṭ jinisko e̠mok̕a
5. Santal ho̠ṛ jãhãe maejiuak̕ hoṛmo bako bemaonta
6. Santalko baṅ ganok̕ak̕ bako kạmiea.
Aboak̕ nunạk̕ daman gunko menak̕ rehõ̠ teheń ayo ho̠ṛko baṅ ganok̕ãk kạmi koren latao ocoet̕koa. Santalkoak̕ jo̠to̠ atorege hạnḍi pạurạko teareda arko akrińeda. Aboak̕ po̠ro̠b se onusṭhanre hạnḍi pạurạ ńu katebon rạskạk̕kna, menkhan iń ghạric̕ge noa do̠ baṅ ganok̕gea. Menkhan benaokate ạkhriń bepari do̠ baṅ ganok̕a ar bạṛic̕ kạmikana. Ona benaoren maraṅ kạrigol doe ayo ho̠ṛkana.
Baḍaegeabon gharońj ar somajre mạlik doko baba ho̠ṛkana. Baba ho̠ṛak̕ begor hukukmte ayo ho̠ṛ ce̠t̕ hõ̠ bae ceka daṛeak̕. Onate sạbudok̕kana noa kạmiren hukumic̕ doe baba ho̠ṛkana. Onate begor botorte jạrkin jạrkin pạurạe ạkhrińeda eṭak̕ jạtren nana hunạr ho̠ṛ ṭhen. Ar onko kiriń ar ńuńueko do̠ baba ho̠ṛge maṅgao ạguet̕ka. Onate ạḍi jojomaṭ bepari do̠ calak̕kana. Atoren sãote eṭak̕ jạt ńugateko dinạmge po̠ro̠b lekako mạndiạukok̕kana.
Gharońj ar somajre noṅkanak̕ hoyok̕kan iạte aema juripuri talare bapag hoyok̕kana, aema ayo ho̠ṛko koclon ococok̕kana, aema paṛhaok̕ gidrạko iskul koelj reko opoman ocock̕kana. Oṛak̕re aema ńuńu peṛako tahẽnte gidrạko bako paṛhao daṛeak̕kan. Atoren eṭak̕ jạt sãote lạṛhại tapam hoyok̕kana, ńindạ aema lekah komṛo bokṛoko ḍherok̕kana, aema kuṛi ho̠ṛko bạṛic̕ok̕kana arhõ̠ aema ạḍi botornak̕ ghoṭona ghọtaok̕kana. Aboren aema juạn ko̠ṛako nisạreko bul capek̕kana. Somajren mẽt̕ perec̕ ńelek̕ rehõ̠ ce̠t̕hõ̠ bako ro̠ṛeda e̠nte̠ onko hõ̠co ńuńu peṛa sãoteko panteakan. Ar asokate ayo ho̠ṛak̕ ḍher eṭkeṭõ̠ṛẽ̠ hoyok̕kana, onate mitṭen lạṭu ạkilan ho̠ṛe menkada (Baba ho̠ṛak̕ go̠ṛo̠ sohot̕ chaḍa okoe ayo ho̠ṛ hõ̠ bạṛic̕ sec̕ bako calak̕a-Abraham Liṅkon)
Santal gharońj ar somaj reak̕ noṅkan bạṛic̕ kạmi ńelte eṭak̕ jạtko aboko nisrạuet̕bona e̠hte̠ eṭak̕ aema ạdibạsu menak̕kore ho̠e e̠ke̠n santal baṅ ganok̕ kạmi doko kạmikana. Onate aboak̕ sedae lekan man manot do̠ bạnuk̕a. Eṭak̕ko chiak̕geko ro̠ṛet̕kana. Noṅkanak̕ do̠ ayo ho̠ṛgeko kạmikante onkoak̕ man marjada bam ńamlenkhan eṭak̕ jạt doe emama? Noa babotre ar mit̕ ho̠ṛe menkada-“Oka jạtire maejiukoak̕ manot bako emakoa, ona jạti do̠ prithimire manot bako ńama-Suin Barn”.
Gharońj ar somajren mit̕ṭen bulbohok̕ ho̠ṛ do̠ tisre hõ̠ bhageak̕ do̠ bae cintạ daṛeak̕. Ar hõ̠ ayo baba bana ho̠ṛge bakin bhagelenkhan tisre hõ̠ bhage kạmi bakin purạu daṛeak̕. Onate bhage bohok̕te bhage kạmiren kạrigol ayo ho̠ṛge benaoko lagaok̕a. Okako kạmire man manot tahẽn onkanak̕ kạmire purạu lạgit̕ ayo ho̠ṛko lại solho ar udgạuko lagaok̕. Asokate gharoń ar somaj lạgit̕ napae napae cintạtet̕ aboren boeha miserako jo̠to̠kote baṅ ganok̕ãk̕ko kạmikan ayo ho̠ṛko joraokate akoak̕ kạmi reak̕ bhage bạṛic̕ babotte galmaraoakoa e̠nte̠t̕ onakote gharońj ar somaj do̠ bạṛic̕ok̕kana, ar eṭak̕ko ṭhen aboak̕ bhar komaok̕kana. Eṭak̕ jạtko akoak̕ jạtre menak̕ãkko lahanti lạgit̕ko ńir baṛaekana ar onate onko do̠ goṭa dhạrtireko so̠do̠r oporom ocock̕kana. Abo sanatal ko hõ̠ aboak̕ menak̕ daman gunkokobon pańja dohṛalekhan sedae leka manotbon rukhiạ daṛeak̕ ar manot salat̕ dhạrtire eṭak̕ko sãotebon girạbạsikok̕a. Tobe sarin katha do̠ noa kanagea, tin hạbic̕ kuṛi ho̠po̠n cetanre pạtiạu, mońj cintạ ar bhage munsuabạ babon dohoe un hạbic̕ gharońh ar somaj reak̕ hõ̠ asol lahanti do̠ tisre hõ̠ baṅ hoyok̕a.

Phoṭo hatao: Santal disom Facebook sakam kho̠n

Leave A Reply

Your email address will not be published.