Santal somajre mit̕ pạris modre bapla cedak̕ barongea

0

Santal jạt se̠ somajre juạn ko̠ṛa kuṛi apnar pạrisren ho̠ṛ são bako baplak̕a. Mit̕ pạris hoe lenkhange boeha miserako sabok̕a. Peṛa barhe hõ̠ ar mit̕ sombond hoyok̕kana jạt pạris sombond se̠ pe̠ṛa pạrbhạ. Mare hapṛamko ho̠te̠te̠ jạt pạris e̠m ar niạmạri to̠l tear kate nit hạbic̕ hõ̠ ona calao manao hijuk̕kana. Noa niạmạri cetan Santal somajren ho̠ṛko nahak̕ hõ̠ko manot gea ar ạḍi susạr monteko manao ạguieda. Onate somajre mit̕ pạris modre bapla do̠ ekalte barongea. Mahali ar urạu jạtko hõ̠ ako somaj noṅka ạriko manao ạgueda mente baḍaeok̕kana. Okoe noa niạmạriko rạpuda uni do̠ somaj kho̠nko ńurhạiea se kạuḍiko Ḍanḍomea. Nahak̕ noa niạmạriko rạput̕kada oṅka ho̠ṛ ạḍi ko̠mge mente baḍaeok̕kana.

Santal jạtkoak̕ nagam kho̠n baḍaeok̕kana. Thạkur Jiu (God) Dhạrtiren sanam lekan janwar tear tayo̠m barea Ho̠ṛ muṭhạn teare menkeda. Uni hasate barea ho̠ṛ tear menkeda Jive̠t̕ ho̠e e̠m okte se̠rma kho̠n (Dinren siń sadom) phe̠ḍ kate barea muṭhạn do̠e phanda ge̠je̠rkeda. Thạkur jiu un o̠kte̠ monsubạ keda hasate ar ho̠ṛe tearkoa. Uni hãs hãsil cẽ̠ṛẽ̠́e tearket̕kinạ. Unkin cẽ̠ṛẽ̠ do̠ bareakin belekeda. Ado̠ o̠kte̠ macharege onakin belekin kho̠n barea man manwakin busạk̕ena. Mit̕ do̠ ko̠ṛa ar mit̕ do̠ kuṛi. Onkin do̠ pilcu haram ar pilcu budhi.

Onkin do̠ hihṛi pipṛireko haṛa buṛuena. Mit̕ din liṭạ buṛi do̠ pilcu haṛam ar pilcu buḍhi ṭhe̠n he̠c̕kate hạṇḍi tear ạri ar ńũ reak̕ niạmạri cet̕oṭoat̕kina. Onkin hạṇḍi ńute bogetekin bul aral koralena. Ạḍi ńindạ hoenkhan mit̕rekin gitic̕ena. Tayo̠mte oṅkinren eyae goṭe̠n ko̠ṛa ar eyae goṭe̠n kuṛi gidrạko hoyena.

Onko sanam umạrteko haṛa buṛuk̕kan tahẽna. Pilcu haṛam gidrạko birte são sendrae calak̕a ar pilcu buḍhi kuṛiko niyete̠ eṭak̕ sec̕ aṛak̕ sidko calak̕a. Ạyup̕ hoelenkhan banar do̠l ge oṛak̕ko ruạṛ hijuk̕a. Mit̕ din kuṛiko go̠go̠ begaorte suṛukuc̕ birte aṛak̕ sit̕ko calaoena. Ado aṛak̕ sit̕ mokońte capakiạ baṛe dare butạre, onḍoṅ hec̕kate baṛe jorore jhilok̕ e̠ne̠c̕ko e̠ho̠p̕ena. Ar ko̠ṛako enhilok̕ baba begor te Khanderae birte eskarge sendrako senena. Mit̕ṭen bạibindi jelko goc̕akade tahẽkana, ar gok̕katko ạguiede kan tahẽkana. Ado ackage kuṛiak̕ sereń ańjomkateko menkeda, “Oteya! cele bhalako sereńeda?” Ńelket̕koako, kuṛiko sereńkan. Ado jel dohooṭo kate, oṅko ṭhen sen sorkate oṅko tuluc̕ enec̕ko dhurạuena ar ạḍi hãsgeko ạikạukeda. E̠ne̠c̕ mucạt̕ lenkhan maraṅ ko̠ṛa do maraṅic̕ kuṛi, tala ko̠ṛa do̠ talaic̕ kuṛi, oṅkage huḍiń hapṛak̕ lekateko bachao hataoena. Ado jotoko ako akotegeko juri jotạukhan, buḍhi ar haṛam do̠ oṅko Baplako lạgit̕ goṭakeda. Mit̕ṭen maraṅ okoc̕ oṛak̕kin benaokeda ar ona oṛak̕re eyae goṭenkin kandhkeda. Mimit̕ kandare babar ho̠ṛkatekin dohoket̕koa. Ene ado bapla hoetakoa. Gidrạ pidrạ hõ̠ hoekhan saṅgeyena. Ado haṛam budhi apanar modre gapalamaroko dhurạuena, Tin o̠kte̠ okoe hõ̠ bako tahẽlena alań bana ho̠ṛlan bapla lena ar eyae goṭen kate ko̠ṛakin hoelena. Ar boeha ko̠ṛa kuṛi modre bapal laṅ emkeda. Nahak̕ abo oṅko modre jạt pạrsibon tearak̕, jãhãtis ako boehao modre bako bapla. Noṅka lekate jạt pạris koak̕ ńutum hõ̠kin emkeda lạṭu ko̠ṛa do̠ hãsdak̕, Uniren kạṭic̕ boeha Murmu, uniren kạṭic̕ boeha Kisku, inạ tayo̠m Hembrom, Marḍi, Soren, Ṭuḍu paṛi pạri lạṭu kh̠on kạṭic̕ boeha dhạbic̕ jạt pạrise emena. Oṅko sanam juri paṛi ṭhen noa niạmạri toloṭokeda, Ape aperen gidrạ mit̕ jạt pạris modre alope baplakoa. Oṅko onḍe tahẽn o̠kte̠ arhõ̠ko saṅgiena.

Hihiṛi pipṛi kho̠n cet̕ iạte coṅko uṭhauena. Onḍe kho̠n do̠ harata disạmko calaoena. Onḍe kho̠n khojkaman disạmteko hec̕ena oḍe ḍher dinko tahẽna. Haraterege ạḍiet̕ko bạṛic̕ena ar ako akoge jãhãn cipinihạu baṅ tahẽkantakoa. Onate Ṭhkạur jiu doe hohoat̕koae manwa, menkhan baṅko hetawat̕taea. Onate ṭhakur jiu do̠ unkin pilcu haṛam ar pilchu buḍhie hohoat̕kińa, ar buru danderte bolok̕e metawat̕kina. Inạ tayo̠m eyae siń ar eyae ńindạ se̠ṅge̠l dak̕te sanam manwa ar janwarko mohoe meṭaoket̕koa. Pilcu haṛam ar buḍhi harata dander umul hatao kate bańcao sarec̕ena. Dosrate unikin ren arhõ̠ gidrạ pidrạ hoekateko saṅgiena. Harata kho̠n oṅko sasaṅ beḍa reko calaoena, okare ḍher dinko tahẽna. Onḍe lahateń jạt pạrsi teko arhõ̠ko hạṭińena. Pạhil eyae goṭen jạt pạris Has̃dak̕, Kisku, Mạrḍi, Soren, Hembrom, ̇Ṭuḍu são arhõ̠ mõ̠ṛẽ̠ goṭen jạt pạrisko hataokeda Besra, Baske, Pạ̃uriạ, cõṛẽ, Bedea. Bedae jạt do̠ kathaeat̕ kanako. Inạ tayo̠m campa gạṛ re ạḍi dinko tahẽlena. Campa reak̕ mane do̠ mõ̠ṛẽ̠ gaḍa disạm. Nonḍe ge gaṛko benaokeda. Okare judạ jạt pạrsiak̕ judạ judạ kạmi tahẽlena. Kisku pạrisren ho̠ṛ do̠ rapajko tahẽlena, Murmu pạris ren ho̠ṛ do̠ ṭhạkurko tahẽlna, Soren pạris ren ho̠ṛ do̠ sipạhiko tahẽlena, Hembrom pạris ren ho̠ṛ raja bud emok̕ic̕ ho̠ṛko tahẽlena, Mạrḍi pạris ren doko kisạr se kipisạ̃ṛ ho̠ṛko tahẽlena, Ṭuḍuko do̠ mạndạriạ, Baseky do̠ bepari ho̠ṛko tahẽlena. Judạ jạtak̕ kạmi babod jãhãnak̕ baṅ baḍae lena.

Santalkoak̕ Ge̠l bar pạris 

Santal pạrsi reak̕ thok no̠mbo̠r

Kisku 32, Hãsdak̕ 41, Soren 46, Murmu 65, Hembrom 32, Marḍi 49, Ṭuḍu 48, Baske 31 Besra 27, Cõ̠ṛẽ̠ 18, Pạuria 16.

Sanam jạt pạris modre aema thok ar ḍaṛ menak̕. Latar re thok ḍạr men hoeena.

1.Hãdak̕: Nij, Sada, ̇Cilbindhạ, Naeke, Kherwaṛ, Keḍwar, Baḍwar, Jihu, Gaṛ, Baḍar, Jugi, Mahananda, Piṭi khanḍa, Rok̕ lutur, Chil lunḍhạ.
2. Kisku: Nij, Sada, Sada, Mańjhi, Ok̕, Aḍ, Lat̕, Laher, Gaṛ, Patal, Badaṛ, Jabe, Rok̕ lutur.
3. Murmu: Nij, Sada, Mạnjhi, Naeke, Obor, Biṭol, Power, Gaṛ, Copyar, Badaṛ, Laher, Saṅ, Datela, Hạnḍi, Mạhut, Jugi, Tikạ, Jugdi.
4.Mạrḍi/Maranḍi: Nij, Mạńjhi, Naeke, Rot̕, Khara, Kaḍa, Hesel, Gaḍa, Buru beret Bedaṛ, Gaṛ, Lạkin, Badoli ṭikạ.
5.Soren: Nij, Sada, Mạńjhi, Sidup̕, Ok̕, Saṅ, Son, Luṛkạ, Cehel, Ṭikạ, Noṛko lumạm, Khanḍa Soren, Mạilạ, Rok̕ lutur, Naeke khil.
6.Hembrom: Nij, Sada, Mańjhi, Naeke khil guạ, Guwa, Guạ, Laher, Lat̕, Gaṛ, Ninạr, Ok̕.
7.Ṭuḍu: Nij, Sada, Mańjhi, Naeke, Lat̕ ṭuḍu, Lat̕, Laṛ, Cigi, Laher, Datela, Gaṛ, Sada, 8. 8.Baskey: Mańjhi, Naeke, Sạrugada, Ok̕, Lat̕, Bhitạr, Poṭom, Gaṛ, Baske hoṛak̕.
9. Besra:Mạńjhi khil, Son, Kạhu se Kuhi, Ok̕, Biṭol, Gaṛ, Khanḍa, Bhinsạr, Bhinḍar, Guạ.
11. Paũriạ: Nij, Mạńjhi, Naeke, Poṭom, Sada,Naeke khil, Cõṛẽ Cacarhat̕.
Noako thok se thok ḍạr cekate hec̕akana,ona babod jo̠to̠ renak̕ ge mare kahni menak̕. Dhạrti reak̕ sirjạu jeleka aema lekan jinis dare, nạṛĩ, Janwar, Cẽ̠ṛẽ̠-ciprut kho̠nko noa hec̕akana. Cet̕leka Hãsdak̕ geḍe kho̠n hec̕akana, , Oṅka leka Hembrom Supari khon, Murmu Nil raṅ Goe kho̠n.

Loṭghuṭi ar baron niạmạriko

Mare hapṛamkoak̕ niạmạri lekate noṅka ho̠ṛ são bapla se loṭghuṭi ekal baron gea se oṅko sor calao hõ̠ pap/ghạṭ hisạbte ńel hoyok̕. Je̠le̠ka jãwãeren lạṭu boeha se boehako são. Ona chaḍa oṅkoak̕ umul hõ̠ baṅ lebet̕oak̕. Noṅka leka bạhu ren lạṭu didi noṅka leka sombond re paṛak̕. Noko ho̠ṛ são ro̠ṛ landa, hạ̃si ṭhaṭha korao ge baron gea. Baha po̠ro̠b o̠kte̠ noṅkan ho̠ṛ cetan dak̕ citạu hõ̠ mana gea. Niạ chaḍa hõ̠ bokon bạhu ar ajhnare modre baron ạri menak̕̕. Apnar mudre hoṛmo jo̠ṭ̣e̠t̕ baron gea. Mit̕ raca se aṭe̠t̕ oṛak̕ reak̕ hudrạ (room) re bako durup̕ daṛeak̕. Balea ar jãwãe ar bạhu so̠mbo̠nd ho̠ṛ ge ako mudre ńutum ńum kate hoho do̠ baron gea.

Jãhãe sombond ho̠ṛ são ro̠ṛ landa ar hạ̃si ṭhaṭha calak̕:

Jãwãe ar bạhu ren kạṭic̕ ko̠ṛa ar kuṛi boeha são, goṛom ba são goṛo ko̠ṛak̕ ar goṛom buḍigo são kuṛiak̕, Goṛom ba ren goṛom ko̠ṛa ac̕ bạhu são, ko̠ṛa ar baba ren boeha kuṛi ren jãwãe são.

Jãhãe mãyãm sombond ho̠ṛ são bapla ar loṭghuṭi do̠ baron gea:

Ko̠ṛa gidrạ ar go̠go̠, Apat se apnar kuṛi gidrạ são, Jãwãe ar hańhartet̕ go̠go̠, Ko̠ṛa ar kuṛi boeha mudre, bhạcạt ko̠ṛa, bhạgni ar nana (Baba ren kuṛi boeha), Ho̠po̠n ba, bhạgni ren kuṛi boeha (Boeha ren kuṛi), baba ren ho̠po̠n ren ko̠ṛa kuṛi. marṅba hato̠m boeha (Ho̠po̠n ba ren ko̠ṛa), baba ren boeha ren kuṛi, go̠go̠ boeha ren kuṛi, kạki gidrạ ar kạki gogo (Baba ren do̠sar bạhu), ba-nońhar ar kạṭic̕ boeha ren bạhu, hońhar ar ko̠ṛa gidṛa ren bạhu, bhạcạt̕ kuṛi ar bhạgni ren jãwãwe ar baba ren boeha ren bạhu. Gogo ren boeha ren bạhu, maraṅba hato̠m boehako ar mama ren boeha ren jãwãeko ar kạṭic̕ maraṅba hato̠m ren boeha ren mama boeha ren bạhu (Mane baba ren boeha ren ko̠ṛa ar go̠go̠ boeha ren ko̠ṛa judi uni ho̠ṛ kho̠n kạṭic̕ hoelenakhan. Jãwãe ar hońhar ren kuṛi boeha, ho̠po̠n ba boeha ren Jãwãe ar boeha ren ko̠ṛa ren bạhu, kạki baba ar kạki kuṛi, kạki kuṛi boeha ar kạki ko̠ṛa boeha, maraṅ ba hatom boeha, baba ren boeha kuṛi ren kuṛi, go̠go̠ ren boeha kuṛi ren kụri, goṛomic̕ ar budigo (Baba ac̕ go̠go̠, go̠go̠ ren go̠go̠), goṛomic̕ se baba ren kuṛi boeha, baba ren go̠go̠ kuṛi boeha, go̠go̠ ren baba ren kuṛi boeha, go̠go̠ ren go̠go̠ kuṛi boeha, hońhar ar ko̠ṛạ ren bạhu ren kuṛi boeha, Bạhu ren goṛom ba, mama ba ar goṛomic̕ ren bạhu, Jãwãe ar bạhu ren ko̠ṛa boeha ren bạhu, bạhu ren boeha kuṛi, ko̠ṛa gidrạ ren bạhu kuṛi ac̕ go̠go̠, kuṛi ren Jãwãe ac̕ go̠go̠. Hońhar ar kuṛi ren Jãwãe ren kuṛi boeha, hopon ba boeharen Jãwãe ar bạhu ren ko̠ṛa boeha kuṛi gidrạ, bạhu ren boeha kuṛi ren kuṛi.

Santal somaj re mit̕ jạt pạris thok se pạrsi ḍạr mudre bapla do̠ baron gea. Mit̕ jạt pạris ren ko̠ṛa kuṛiko mudre dulạṛ reak̕ sombond sap̕ ńam lekhan se loṭghuṭi babaod cinhạ ńam lekhan oṅko somaj kho̠nko ńurkoa se ḍanḍomkoako.

Lahate mit̕ jạt pạris thok mit̕ baṅ hoelenakhan hõ̠ bapla baṅ hoekoak̕. Noa chaḍa go̠go̠ pạrsi ren thok ḍạr são bapla baṅ hoekoak̕. Cedak̕ je judạ judạ jạt pạris ren judạ judạ boṅgako tahẽlena. Oṅko dewa sewa lagaokoak̕. Ona karonte mare hapṛamko menet̕ kan tahẽna, Mit̕ jạt pạris ren ale mit̕ than rele dewa sewaeak̕.
Santalko dho̠ro̠m, ạricạli, samajik se jạtiạ lekate baṅ begar ạri doho ar jumid dohoe rukhiạ lạgit̕ deko sãote bapla baṅ hoekoak̕.
Nagam baṅ baḍae iạte aema ho̠ṛ geko kukuliak̕ cedak̕ mit̕ pạris mudre bapla baṅ hoyok̕.

Laha rege menhoeakana Santal ho̠ṛkoak̕ sirjạu nagam re oṅkoren mare hapṛam boeha mudre baplae baron kada. Ona niạmạri ona un o̠kte̠ nit̕ hạbic̕ calao hijuk̕kana ar manot salak̕ manao hoyok̕kana. Noa niạmạri oṅkoak̕ aṭkar, sahet̕, mãyãm, jel harta ar jaṅ são mesalakana. Oka do̠ somaj reak̕ ạḍi aẽ (Sensative) niạmạri kana. Mit̕ jạt pạris mudre cedak̕ bapla baṅ hoyok̕, ona babod mit̕ kạhni (Mythological Story) menak̕. Kạhni noṅkana, Mit̕ buḍi go ren mõ̠ṛẽ̠ go̠ṛo̠mic̕ko tahẽlena. Mit̕ din tala boeha bir kho̠n baha dare ạgu kate okare kanḍako dohoe onḍe rohoe keda. Thora din mudre ona dare haṛa buṛuena. Ạḍi sada baha phutạuena. Hoe te lewer keder laṛa ar cet̕ mõ̠ ńelok̕. Ona ńel tala ko̠ṛa boeha go̠ṛo̠m buḍie metaodea, buḍi noa baha jãhã aloko sit̕. Okoe noae sit̕ak̕ uni bapla kateń aṛak̕e, bạń aṛak̕ea. Boeha ko̠ṛako mit̕ birre sendrako calaokana. Oṅkoren boeha kuṛi ona aphsorre ona baha sit̕ kate sut̕rec̕ rebet̕keda. Ona ńel te buḍi goe menkeda, haere cet̕ em ceka keda? Cet̕eń cekaeak̕ boeha ko̠ṛa judi boeha kuṛiko baplako. Niạ katha ańjom uni kuṛi boeha budi kuli lenkhan, unie ro̠ṛ ruạṛ keda Nahak̕ am ko̠ṛa boeha mudre mit̕ ho̠ṛ bapal lagak̕a. Noa katha ańjomte lajaote dạṛ kedae. Sendra kho̠n hec̕ kate tala ko̠ṛa ńel kedae okoeco ona baha sit̕akada. Uni ṭhkạur kulikidia, Okoe bahae sit̕keda. Buḍi ro̠ṛ ruạrkeda kạṭic̕ kuṛi. Tala ko̠ṛae menkeda, uni okare nit̕ ge uniiń baplaeak̕. Tala ko̠ṛa uni boeha kuṛi sap̕ ạgu kate bapla kidia. Un o̠kte̠ lajao te uni kuṛi ac̕ak̕ jiv̠et̕ ac̕te goc̕keda ar uni ko̠ṛa hõ̠ ac̕ak̕ hoṭok̕ get̕ topak̕ kate goc̕ena.

Uni kuṛi ren mãṛi rak̕ kate menkeda, Baba ińak̕ mãyãm ar boehak̕ mãyãm mit̕ baṅ. Ar ko̠ṛa ren mãṛi rak̕ kate menkeda, ińak̕ mãyãm ar boehak̕ mãyãm banar hoṛte calak̕a. Oṅkoak̕ mãyãm judạ ḍahar te juḍa judạ judạ ạtu calaoena baṅ milạuena. Ato ren ho̠ṛ oṅkoak̕ mãṛi rapak̕ lạgit̕ ceta ko tearkeda . Un o̠kte̠ kuṛiak̕ mãṛi rak̕ kate menkeda, baba ińak̕ dhuã an boehak̕ dhuã mit̕ baṅ. Ar ko̠ṛak̕ mãṛi rak̕ kate menkeda, baba ińak̕ dhuã ar boehak̕ dhuã judạ judạ lekate oṭaṅ calak̕a. Un o̠kte̠ khon santal somaj re boeha modre bapla do̠n bhạlại baṅ mente hudisak̕. Bhạlại baṅ hoyok̕ se bạṛic̕ hoyok̕ noa monre rebet̕ akana Ona iạte mit̕ jạt pạris modr bapla se boehako mudre bapla do̠ sanatalko mit̕ leka geko hudisa. Noa banar mudre jãhã pharak bạnuk̕a. Kaṛon mon mudre mit̕ lekan aṭkare teara. Noṅka sombond ko̠ṛa kuṛi mudre miljil hoelenkhan oṅko somaj kho̠nko ocok̕koa se ńurkoa. Maṛuk oṅkoak̕ dulạṛ tonol ho̠te̠te̠ kạṭic̕ se lạṭu ghạt hoekana se baṅ ona cetan bicạr kate sajại ar kạuḍi ḍanḍomkoako. Latar noṅkana hal (Case) nạmunạ men hoeena;

10.1. Dalali ato ren bhaea murm do̠ fudki murmuak̕ dulạṛ tonol re ńurhạena. Bana ho̠ṛak̕ jạt pạris ar thok ḍạr mit̕ ge tahẽlena. Mit̕ din loṭghuṭi o̠kte̠kin sap̕ ńamena. Tayo̠m te ren ho̠ṛ oṅkoko somaj kho̠n ńur se biṭlahaket̕koa.

10.2. Masaṅgor ilạkaren bajo hembrom são makhi hembrom loṭghṭi o̠kte̠ sap̕ ńamena. Oṅkoak̕ jạt pạris mit̕ hoelenkhan hõ̠ thok ḍạr do̠ judạ tahẽlena. Ato ren ho̠ṛ oṅkoko biṭlahaket̕koa.

10.3. Judi kaṭhor sạjại baṅ em hoyok̕ khan un o̠kte̠ uni dulạṛ tonol re gabaoakan juṛi ḍanḍom se judạ renak̕ ḍaharko bachaoak̕ menkhan kuṛi hamal hoṛmo lenkhan un o̠kte̠ kuṛi lạgit̕ jãwãe kiriń lagak̕.

10.4. Talbenia ato ren bhogon murmu job ato ren ludgi murmuak̕ dulạṛ tonol rec̕ ńurhạuena. Oṅkoak̕ gạhir macha dulạṛ renak̕ katha ato ren ho̠ṛko baḍae ńamkeda. Somaj ren ho̠ṛ oṅko dusiket̕koa. Ar 15 ṭakako ḍandomket̕koa. Oṅko mudre noa gạhir macha dulạṛ tonol do mucạt̕ena.

10.5. Teljuria ato ren kali murmu jãwãeakana maejiu aṅgir kidia. Pe cando tayo̠m ko̠ṛaren baba oṅko sap̕ ńamket̕koa. Oṅko oṛak̕ re ạguket̕koa, ar uni ac̕ jãwãe ṭhen jimạ kidia. 15 kạuḍi ar kuṛi hõ̠ ḍanḍom kidia. Oṅko mudre gạhir macha tonol noṅkate cabaena.

Nij (Special) goṭa

11.1. Lakhan pur ren roghunath soren duli sorenak̕ dulạṛ re ńurhạuena. Oṅkoak̕ jạt pạris mit̕ tahẽlena menkhan thok ḍạr do̠ judạ tahẽlena. Ato ren ho̠ṛ oṅkoko ḍanḍomket̕koa ar judạ reak̕ hukumko emket̕koa. Raghunat kạuḍi ḍanḍom hisạbte emkeda menkha kuṛi bae bạgi daṛaea lidia. Thora din tayo̠m kuṛi gidrạe janam kidia. Ato ren ho̠ṛ oṅkoak̕ dulạṛ tonolko aṅgoc̕keda ar ạn lekateko manaokeda. Ilạka ren mańjhi haṛam jạt em lạgit̕ko nehõradia. Kuṛi do̠ akoren boṅga sãoko jorakidia ar nãwã murmu pạris ńam keda. Oṅko bapla lạgit̕ somaj ren ho̠ṛko rạjiena. Noko saṅga bapla em hoeena.

11.2. Mirjapur ren gare mardy kataṅgi ato ren kanki mardyak̕ dulạṛ tonol re ńurhạuena. Oṅko baṅla reko dạṛ keda. Onḍenko ho̠ṛ baḍae kate bicạr reko durup̕ket̕koa. Mit̕ murmu pạris ren ho̠rko nehõradia uni kuṛi ren dho̠ro̠m baba hisạbte aṅgoc̕. Uni ho̠ṛ uni ko̠ṛa akoren boṅga tala kidia ar ac̕ren jạt pạrise emkidia. Tin o̠kte̠ noa porob cabaena, oṅkoko baplaena, ar akoak̕ atoreko ruạr calaoena. Oṅkoren ato ho̠ṛ tin o̠kte̠ko ńel keda noko samajik niạmạri lekate sanam porob ar onusṭahn ko manaokada un o̠kte̠ jãhãn koṛao renak̕ jạruṛ bako ạikạuleda. Karon kuṛiak̕ jạt pạris do̠ judạena. Oṅkoak̕ bapla niạmạri lekateko aṅgoc̕keda.

11.3. Kaildas pur ren gaedo mumru lendom murmu são aṅgirena. Gaedo pon ge̠l ṭaka ar lendom ge̠l mõ̠ṛẽ̠ ṭakako ḍanḍomket̕koa. Mit̕ ho̠ṛ lendom ac̕ak̕ boṅga tala kidia ar jạt hõ̠e emkidia. Oṅkoak̕ miljil bapla menteko manaokeda.

12. Ạḍi thora o̠kte̠ ar judi hõ̠ oṅkoren jạt pạris thok judạ tahẽlenkhan, ato ren ho̠ṛ jobor jos kate ḍandom daṛekoa se ikạ hõ̠ daṛeak̕. Noṅkana bicạr un o̠kte̠ ge koṛao hoyok̕ tin o̠kte̠ ko̠ṛa kuṛi gạhir tonol reko joraoak̕. Jãhãn sạjai, budbhorsa, solho oṅkoak̕ mon bae bodol daṛeak̕ se jãhãn goc̕ ḍanḍom hõ̠ oṅko bae begar daṛekoa. Sanam ḍahar tin o̠kte̠ atrak̕ (Fail), un o̠kte̠ mucạt̕ ḍahar, oṅko goc̕ se oṅko bapla em lạgit̕ rạji. Noa o̠kte̠ ato ren keṭej lenkhan ar oṅko cetan kajak̕ niạmạri jạriak̕. Menkhan goṭa hatao o̠kte̠ komjori tahẽlenkhan oka aema o̠kte̠ ge hoyoka. oṅko ikạko ńamak̕ se bapla reak̕ onumutiko ńamak̕.

12.1. Dhanser ato ren majhi hembrom thakae hembromak̕ dulạṛ re ńurhạuena. Oṅkoak̕ jạt pạris mit̕ tahẽlena. Menkhan majhi ren thok ḍạr laher ar thakaeak̕ judạ paris tahẽlena. Oṅko bapal lạgit̕ thir hape tahẽlena. Noko 15 rupi ḍamḍom ar bapla lạgit̕ onumuti em hoeena.

Mit̕ pạris modre baṅ bapla khạli santal jạtkoak̕ eskar niạmạri do̠ baṅ kana se judạ somaj reak̕ ạri birud hõ̠ baṅ kana, aema jạt ar dho̠ro̠m niạmạri são noa miljil menak̕. Adibạsi chaḍa judạ jạt ren ho̠̣r apnar ho̠ṛ mudre jãhãe ho̠ṛ ge ạḍi alga te hili sagại menteko hohoeak, kuṛiko judạ baba ho̠ṛ teańań kateko hohoea. Noa karonte Jãwãe bạhu se judạ ho̠̣ṛ bhul bujhao hoe renak̕ aphsor tahẽna. Menkhan santal soamj re jãhãe maejiu hili se baba ho̠ṛ teńań mente bako hohoe daṛeak̕. Begor oporom ho̠ṛ são apnarak̕ pạris milạukate boeha se ho̠po̠n ba se bhạcạt ko̠ṛa se bhạcạt kuṛi se nana hisạbte sạgại sombond kateko hohoeak̕. Onate santal somaj re begor oporom santalko mudre hili se teńań cet̕ lekate hõ̠ bako hohokoa. Oka santal somaj re ạḍi bạṛic̕ cae colon hisạ teko hudisak̕. Noa ạri karonte baba maejiu mẽt̕ se koyok̕ ńapam bhạlại gea. Mit̕ paris modre jãhãn bạṛic̕ kạmi do̠ baṅ hoyok̕ kana. Mit̕ pạris mudre juạn ko̠ṛa kuriak̕ miljil do̠ santal somaj ren ho̠ṛ bạṛic̕ mẽte bako ńelak̕. Juạn ko̠ṛa kuṛi jãhã re daṛa baṛaeko calao lekhan go̠go̠ baba mit̕ jạt pạris cetan jạstie bhorsak̕. Bises (Special) kate maejiuko hõ̠ apnar p̣ạris ren baba ho̠̣ṛ cetan jạsti as bhorsa doho kateko calak̕a. Baba ho̠ṛ apnar pạris ren ho̠ṛ apnar didi se boeha hisạbteko manaokoa ar go̠ṛo̠e hõ̠ko emak̕. Onate mit̕ pạris mudre bapla baṅ hoekate tion baṅ eṭkeṭõ̠ṛẽ̠ ona kho̠n somaj bhạlại obosta dohoe lạgit̕ ạḍi bhage kạmieda. Jãhã begor oporom ho̠ṛ são oporom o̠kte̠ pạhil rege pạris baḍae kate apnar mudre sombondko tearak̕. Go̠go̠ pạrsi sãote milạu lenkhan mama, kaki, bhạgne, bhạgni sombond tearok̕a. Noa jạt pạris iạte santal ho̠ṛko begor oporom hoelenkhan hõ̠ apnar mudre ạ̣ḍi alga te go̠ṛo̠e lạgit̕ ti lahaeak̕. Noa ạri do̠ somaj re maejiu baba mudre mit̕ rukhiạ daṛekana ar oka dho̠ro̠m niạmạri manaore go̠ṛo̠e ema.

Santal ren mare hapṛamko santal somajak̕ bhạlại hudis kate Noa niạmạriko tearoṭo leda. Oṅkoak̕ Purhut (Spritual), samajik, kạuḍi, rajạri se lekate lahanti se utrạu lạgit̕ noa niạmạri tear hoeakana. Jãhãe ho̠ṛak̕ labh se ạuṛi sạụri te tear baṅ hoeakana. Noa babod W.G Archer meneda, ÔSantal law,as it now exists,is it not an arbitray creation of individual sanatls .To command obedience ,to exist as law at all,it must of necessity be a collection product ,the creation of the tribe itself.

Oṅko lạgit̕ noa ạri tahẽlena bhạlại ar moṅgol lạgit̕. Nahak̕ hõ̠ oṅko noa ạriko manao ạgueda. Oka oka niạmạri bodolakana oka oka niạmạri baṅ bodolakana. Jãhãn sudhạr, bodol, bạrti, jãhãnak̕ jorao baṅ hoeakana. Nahak̕ jug re sanam niạmạri jug sãote ṭhik menak̕ se baṅ ? Ona lạgit̕ gạhir macha gobesona (Reserach/ Analysis) ar gapalmaro jạruṛa. Noa reak̕ bhạlại ar bạṛic̕ak̕ ho̠ṛ samaṅ kulạsa lekate rakap̕ lagak̕ ar miljil kate ho̠ṛkoak̕ do̠go̠j (Support) se mit̕ mot lekate sudhạr, bodol, get begar, nãwã te jorao se osar lagak̕. Jãhãte noa jug sãote calak̕ ar sanam ho̠ṛko aṅgoc̕ daṛeak̕.

Umul pańjae

1)W.G.Archer.Tribal law and justice ,A Report on the Santal .Vol.1,2,3,new Delhi,1984

2)A.Campbell, Santal –English and English Dictionary .The Santal Mission Press .Pokuria,Manbhum,India 1993.

3)Bodding,P.O Har Koren Mare Hapramko Reak Katha,Mani Tese Italy,1983

4)J.Troisi,Tribal Religion,Religious Beliefs Practices Among the Santal,Manohar,Delhi,1978.

5)J.Troisi,The Santal Reading in Tribal life ,Vol-10.Delhi,1978

Leave A Reply

Your email address will not be published.