Santal koak̕ do̠sar maraṅ po̠ro̠b BAHA

3

Baha do̠ ho̠ṛ ho̠po̠nak̕ do̠sar maraṅ po̠ro̠bkana. Ona do̠ Phạgun cando kunạmi kecak̕ hoyok̕a. Mimit̕ se̠rma ạcur purạuk̕re ona ńutumte noa po̠ro̠b do̠ manaok̕kana. Noa o̠kte̠ mare sakam ńur kate nãwã sakam sagenok̕a. Sarjom dare un o̠kte̠ thopa ́hopa bahak̕a, icạk̕, nim ar murup̕ hõ̠ bahak̕a. Un o̠kte̠ge matkom hõ̠ gelek̕a. Ńe̠le̠ ḍumur ar cẽ̠ṛẽ̠ko do̠ he̠ṛe̠m rasako cepeja. Ạuri baha po̠ro̠bok̕ hạbic̕ ho̠ṛ ho̠po̠n do̠ icạk̕ baha ar murup̕ baha bako cepeja, ar sarjom bahate hõ̠ bako bahak̕a se matkom hõ̠ bako joma. Okoeko cepej seko jom lahale khan onko oṛak̕te do̠ naeke bae senok̕a ar bae jom ńuit̕akoa ạuri baha po̠ro̠b hoyok̕ hạbic̕. Baha do̠ dho̠ro̠m po̠ro̠b kana.

Baha e̠ne̠c̕ reak̕ leyoṅ (Picture)

Baha Po̠ro̠b Nenḍae

Baha po̠ro̠b Manao lạgit̕ Man Mạnjhi Baba (a Village Headman) ar Paranik (a Deputy Headman) do̠ apnarekin gapalmarao. Inạ tayo̠m do̠ naekekin (Village Priest) hoho sorea. Uni hõ̠e rạmjạulena khan, Baha Po̠ro̠b manao reak̕ sap̕sor lạgit̕kin metaea. Khan Mạńjhi do̠ kulhi-duṛup̕ hohoe lạgit̕ goḍete (a Messenger) metaea ar atoren jo̠to̠ sẽṛã ho̠ṛko do̠ mạńjhi se̠ naekeak̕ oṛak̕reko duṛup̕a. Kulhi duṛup̕re naekege̠ye̠ lại saḍea, baṅma de̠n baha po̠ro̠b lạgit̕ dinbo nendạjoṅa. Noṅka leka jo̠to̠koak̕ kupusi lekatege Baha Po̠ro̠b manao din-tạrik̕ko goṭa joṅa.

Baha reak̕ Leg-Bhag

Nenḍa din tiạk̕e-nkhan, laha hilok̕ atoren ko̠ṛako jaherre sạṛimko benaoa baṛaea, mit̕ do̠ jaher Era, Mõ̠ṛẽ̠ko ar Maraṅ Buruko lạgit̕, ar mit̕ do̠ Gõ̠sãe Era lạgit̕. Naeke do̠ jo̠to̠ Boṅga Thane guric̕ oṭokak̕a ar umok̕ko calak̕a. Than oṛak̕ dadap̕ ko̠ṛako do̠ umkate naeke oṛak̕teko ruạṛa ar Naeke do̠ hạnḍi ar dakae e̠makoa. Jo̠m baṛakate ato sor reak̕ birte se̠ndrako riạu calak̕a. Daka jo̠m baṛakate Naeke do̠ Haṭak̕, Dạuṛạ, Ak̕-sar, kạpi, Jo̠no̠k̕ Boṅga reak̕ sakom, Sikṛi Mala, Ghạṇṭi ar Sakwakoe ạrup̕ ạguea. Ado̠ rit̕ mithi ar sunum ona sapap̕kore̠ye̠ ojok̕ak̕a ar mit̕ṭe̠c̕ nãwã ṭhili ar mit̕ lạṭi sutạm hõ̠e ojok̕ak̕a. Ko̠ṛako hõ̠ se̠ndra kho̠nko ruạṛa ar ạyup̕ hõ̠ ạyup̕ena.

Un hilok̕ Goḍet Naeke t̠he̠n pe̠a sime sap̕ idikoa. Onko do̠ Naeke simko metakoa. Ạyup̕ tora kho̠n Naeke oṛak̕re ṭamak̕ko ruiea ar sakwako oroṅa. Ona ańjomte Boṅga hõ̠ko rum hijuk̕a ar ato ho̠ṛ hõ̠ko jarwak̕a. Naeke do̠ boṅga sapap̕e oḍok̕katakoa. Rumok̕ko do̠ pe̠ ho̠ṛko. Mit̕ do̠ Jaher Era, mit̕ do̠ Mõ̠ṛẽ̠ko ar mit̕ do̠ Maraṅ Buru. Jaher Era do̠ hatra hạtṛikate sikṛi sakom horoga, dạuṛại dipila ar jo̠no̠k̕e saba. Mõ̠ṛẽ̠ko do̠ ak̕ sare saba ar Maraṅ Buru do̠ kạpiye goga. Onkate jaherteko ńir calak̕a ar atoren ko̠ṛa tayo̠m tayo̠mteko khudạu idikoa. Jaherre senkate Jaher Era do̠ Boṅga thanko jo̠k̕ ṭanḍia ar unkin do̠kin ńe̠l idia. E̠nka baṛakate oṛak̕teko ruạṛ hijuk̕a.

Naeke doe boṅgaea Baha po̠ro̠b disạte

Naeketạkin haṛam buḍhi do̠ noa ńindạ otrekin gitic̕a neo dho̠ro̠m lạgit̕. Do̠sar hilok̕ naeke do̠ boṅga sapapak̕koe sajaotaea : Mit̕ṭen nãwã dạuṛạ, mit̕ṭe̠c̕ ḍạlic̕ hopon, adwa caole, sunum, sindur ar mit̕ṭe̠n kạpie soṅge toraea. Ḍạurạre do̠ sikṛi, sakom, jo̠no̠k̕ noakoe sajaoa ar ak̕-sar, sakwa, mit̕ṭe̠n nãwã ṭhiliko metak̕a. Ado̠ pujại kạmi purạu lạgit̕ jahe̠rteko calak̕a. Naeke tayo̠m tayo̠mte kuṛi ko̠ṛako e̠ne̠c̕ idia arko sereńa:

Li piṇḍạ lipi piṇḍạ
Teheń do̠ naeke do̠ jạtiregeye gitic̕len
Teheń do̠ naeke do̠ jạtiregeye nirạloen

Naeke do̠e um hijuk̕. Um h̠ec̕ kate boṅga thanko guric̕ak̕a. Ado̠ jahereye boṅgake̠t̕ge.
Ạyup̕ o̠kte̠ atoren ho̠ṛ Naeke Jahe̠r Than kho̠n daram katey ạguea. Naeke são nãwã haṭak̕ dạurạte nãwã bahae ạgu toraea ar ṭhilite dak̕ ạgue hoyok̕a. Naeke do̠ sanam oṛak̕re kaṭako ạrubea, jãhã uni kaṭako ạrubeak̕ uni do̠ haṭak̕ reak̕ baha sandes hisạbte e̠m calakoa. Ar un o̠kte̠ maejiuko sut̕re bahako bahaea.

Bho̠j reak̕ bondbos

Ho̠ṛ ho̠po̠n do̠ ạḍitet̕ gãotali jạt kanako. Onate bahare hõ̠ mit̕ sãote jo̠m ńu reak̕ko bondbosa. Do̠sar hilok̕ Naeke Era um he̠c̕kate ho̠lo̠ṅe huṛuṅa ar goḍet do̠ bhoj daka bondbos lạgit̕e kurmuṭuia. Ona lạgit̕ goḍet do̠ atore sime sap̕koa. Oṛak̕ ọrak̕ mimit̕ goṭe̠c̕ kate sim, ona sãote caole ar sunum hõ̠e uṭhạua. Ado̠ tikin hõ̠ tikinena ar daka utu hõ̠ sạtena. Goḍet do̠ bhoj jom jarwak̕ lạgit̕ oṛak̕ oṛak̕e hohoea . Adi kạṭic̕ lạṭu jo̠to̠ko jaroalenkhan rạskạ se̠le̠t̕ bho̠jko jo̠mket̕ge. Bho̠j do̠ santal somaj milijul reak̕ mit̕ maraṅ cinhạge.

Rijroṅ Ar Rạskạ
Ho̠ṛ ho̠po̠n do̠ ạḍi rạskạ jạtkanako. Onate jo̠to̠ po̠ro̠brege ạḍiko rạskạk̕a. Baha po̠ro̠bre hõ̠ ạḍitet̕ko rạskạk̕a. Bahare ko̠ṛa kuṛi do̠ mit̕ nińdạko e̠ne̠c̕ aṅgaea. Ar ạḍi jut sereńko sereńa. Bahare do̠ e̠ke̠n jut̕ sereńge menak̕a. Lajao paṛa bạnuk̕a anec̕ onako sereń do̠. Ar tamam ńindạ ko̠ṛa kuṛiko e̠ne̠c̕ sereńre hõ̠ ghạt bạnuk̕takoa. Kuṛiko do̠ unre aso̠kaete sarjom se̠ nim e̠manteak̕ bahakote ạḍitet̕ ạḍi napaeko bahak̕ạ. E̠ke̠n e̠ne̠c̕ sereń mo̠to̠ do̠ baṅ. Bahare do̠ khilạḍ hõ̠ ạḍi ãṭ̕ko khilạḍa. Atoren kuṛi ko̠ṛa do̠ bahare ato atoreko khilḍuk̕a. Dak̕ko aparec̕ joṅa. Ar haṛam buḍhi hõ̠ ganok̕ ho̠ṛko aparec̕ joṅa. Baha do̠ ạḍitet̕ge rạkạwanak̕ kangea.

Jãhãge dak̕ aṛec̕ do̠ baron

Lạṭu boeharen bạhu (bo̠ko̠t bạhu) se̠ bạhuren lạṭu kuṛi boeha ajhnạr. Noko modre somobond do̠ ạḍi manotgea.

Nãwã horaren ho̠ṛ ho̠po̠nkoak̕ Baha po̠ro̠b

Nãwã ar mare horaren ho̠ṛ ho̠po̠nko modre po̠ro̠b eman manaokore thoṛa pharak menak̕a. Ar ona pharak̕ do̠ e̠ke̠n po̠ro̠b manaore dho̠ro̠m teak̕ leg-acartet̕re. Baha po̠ro̠b hõ̠ nãwã horaren ho̠ṛ ho̠po̠n do̠ akoak̕ neo dho̠ro̠m leakteko manaoet̕kana. Nenḍa dinre oṅko do̠ girjạre dewa-sewa lạgit̕ko jarwak̕a. Naeke Baba do̠ jo̠to̠ ato ho̠ṛ ńutumte dewa-sewae samaṅa. Unre Naeke Baba ar jaroawakan ho̠ṛ rạisiạko do̠ sisirjạuic̕ko sarhaoea, e̠nte̠ ar mit̕ṭe̠n nãwã se̠rma ńe̠l lạgit̕ ạte e̠mat̕koa. Arko binitiea je̠mo̠n noa nãwã se̠rma hõ̠ paromen serma lekan mõ̠ńj hoyok̕tako. Sulukte ar supulukteko tãhẽ daṛeak̕ lạgit̕ dewa-sewa o̠kte̠ko bintia.
Ado dewa-sewa mucạt̕e̠n khan mare ho̠raren ho̠ṛ lekageko khilạḍok̕a, e̠ne̠c̕ sereń arko jo̠m-ńũ  rạskạk̕a. Ad̠o ńindạen khan do̠ apan-ạpin oṛak̕teko senenge. Nahak̕ do̠ ado̠m ado̠m jaegare noa po̠ro̠b hõ̠ko hiriń idiet̕kana. Onate noa po̠ro̠b manao reak̕ khodte̠t̕ hõ̠ko hiṛiń idie̠t̕kana. Ar ḍhe̠r ṭoṭharege nahak̕ do̠ dekoko são Ạṅreji se̠ Baṅgla Nãwã se̠rmako manaoe̠t̕kana. Noṅkate Santal ho̠ponak̕ nãwã se̠rma do̠ bại bạite hiriń idik̕kana. Noa rukhiạ do̠ho̠ idie lạgit̕ jo̠to̠koge so̠nto̠ro̠k̕ ạḍi jạruṛ menak̕a.

 Sikhạuna: Pal po̠ro̠b ho̠te̠te̠ Santal somajre Sopohot̕-go̠po̠ṛo̠ to̠no̠l do̠ kajakok̕ kana.

Tumạl:  Baṅladisạm reak̕ Ińak̕ Santali puthi Ạkil Ḍahar kilạs 4 puthi kho̠nak̕

3 Comments
  1. Albinus Soren says

    Aḍi napae. Sanamko baḍaejoṅ jạruṛ menak̕a..

  2. admin says

    Johar. Aema sarhao.

  3. Ckr says

    Please contact me
    7381385143

Leave A Reply