Nahaḱ jugre̠ Santal Hul manao reaḱ jo̠ste̠t́ do̠ ce̠t́ hoe daṛeaḱa?

0

Santal Ho̠po̠n koaḱ nagamre̠ Santal Hul do̠ ạḍi maraṅ cinhạ se̠ kạhni kan tabona. Noa Hul bakhra tege teheń abo do̠ Santal se̠ Ho̠ṛ ńutumte̠ goṭa dhạrtire̠ mit́ṭe̠n jạt leka ạḍi go̠ro̠b salaḱ bon bikạo̠ḱ kana. Ar noa reaḱ sanam lekan gunman manot johar do̠ Sido̠-Kạnhu-Cand-Bhaero̠-Phulo̠muni ar Jhano̠ Murmu noko turui go̠ṭe̠n boeha misrage ńam le̠k kana ko. Jo̠to̠ge bon baḍaea teheń oka Baṅgla, Bharo̠t, Pakistan, Barma, Nepal se̠ bhuṭan jo̠to̠ge mit́ṭen disạm tahẽ kana. Santal, Ko̠l, Bhil, Muṇḍa, Oraon se arhõ̠ eṭaḱ he̠nde̠ muṭhạnan manwage noa disạmre̠n pạhil peṛa ko tahẽ kana. Nagam o̠lo̠ḱ ko se̠ anthropologist lekate̠ aboge pạhil noa disạmre̠ bon se̠ṭe̠r lena. Abore̠n mare hapṛamko bir gajaṛ ko maḱ sapha kate̠ jiwe̠t bańcao reaḱ hora ko tear leda. Bir janwar sãote̠ lạṛhại kate̠ sanam lekan cas abad ko e̠ho̠ṕ leda. Onate̠ abo Ho̠ṛ ho̠po̠nge agriculture so̠bho̠t́ re̠n kạrigo̠l kana bon. Noa disạmre̠ aboaḱ umạr do̠ ado̠m ko ko me̠na 10/20 hajar serma se̠ 60 hajar serma laha kho̠n. Deko pusi se Hindu, Isại, Muslạ, Bōddhō jo̠to̠ kho̠n aboge mare bõs kana bon. Sedae do̠ teheń leka nanan parkan disạm do̠ baṅ tahẽ kana. Onate̠ manwa ko hõ̠ apnar leka buru nala, gaḍa so̠̣ḍo̠ḱ, bir gajar eman teaḱ kore̠ kho̠n jo̠maḱ ko sendra jo̠ṅkan tahẽna. Onka lekate̠ din ke̠ din manwako saṅge utạrena. Noa mare bharo̠t disạm do̠ barhe kho̠n aema ba̠iri ko he̠ć kate̠ rajo̠sṭi ḍanṭao ko e̠ho̠ṕ leda. Un bidạlre abo bir ho̠ṛ sãote̠ barhe disạmre̠n deko se̠ bạṛić manwa ko sãote̠ lạṛhại hoelena. Ado̠ ona lạṛhại kore̠ abore̠n ho̠ṛ do̠ bako daṛe̠ lena. Noa lạṛhại do̠ teheń kho̠n paseć 3500 serma lahare̠ hoe lena. Oka do̠ko metaḱ kana Aryan ar Non-Aryan lạṛhại.
Ona tayo̠m Tilkạ Murmu (Mạjhi) pạhil Santal Hulre̠n mãyãm goha kan tabonae. Unige jo̠to̠ ạdibạsi British birudre̠ lạṛhại lạgit́e̠ sapṛao le̠t́ koa. Noa lạṛhại do e̠ho̠ṕlena 1780 sal se̠ć ar ona lạṛhại se̠ṅge̠l do̠ dhạu dhạute̠ goṭa pasnaoena 1784 serma hạbić. Me̠nkhan noa babo̠d do̠ abo Ho̠ṛ Ho̠po̠n do̠ ạḍi thoṛage bon baḍaea. Ona iạte̠ ńe̠lo̠ḱ kana, abo do̠ pạhil Santal Hul oka do̠ 1780 serma se̠ć e̠ho̠ṕle̠n ar 1784 re̠ co̠ṭ sermate̠ rakaṕe̠n noa bakhra jahan kạmikạsni (program) babon hatao baṛaeda. East India Company ạdibạsi ko ṭhe̠n jo̠r jo̠bo̠r kate̠ khajna ko hataoe̠t́ kan tahẽna. Ona raṅgaote̠ Tilkạ Mạjhi daraete̠ Santal ko Hulko rakaṕ leda. 1784 sermare̠ Tilkạ Mạjhiwaḱ tuńte̠ Bhagolpurren collector August Cleveland do̠e go̠ć ocoena. Ona tayo̠m Iṅgrạj ko ạdibạsi sãote̠ lạṛhạiena ko. Mucạt́re̠ Tilkạ Mạjhi ar sãote̠n ko British ṭhe̠n ko saṕ ocoena. Ar Tilkạ Mạjhi do̠ sado̠m sãote̠ to̠l kate̠ bhagolpurte̠ ko ạgu kedea. E̠nre̠ hõ bae go̠ć le̠nte̠, baṛe darere̠ pạsi kate̠ ko go̠ć kedea. Onate̠ Baba Tilkạ Mạjhi ge goṭa Bharo̠t jạtiạri disạmre̠n pạhil mãyãm goha kan tabonae. Me̠nkhan nahaḱ jugre̠n Santal ho̠po̠n do̠ uni bakhra ạḍi thoṛage ko baḍaea.
Inạ tayo̠m goṭa bharo̠t disạmre jo̠to̠ kho̠n lạṭu Hul hoelena 1855-56 serma. Sido̠-Kạnhu-Cand-Bhaero̠-Phulo̠muni-Jhano̠ Murmu noko turue go̠ṭe̠n misera ar boeha daraete̠. Oka do̠ ko metaḱ kana dosar Santal Hul. Bho̠gnaḍihi kho̠n noa hul do̠ e̠ho̠ṕlena. Jo̠to̠ge bon baḍaea jē, abo ho̠ṛ ho̠po̠n são eṭaḱ ạdibạsige noa disạm do̠ jiwe̠t́ bańcao lạgit́ ko tear leda. Cas abad, bir nala jo̠to̠ge maḱ sapha kate̠ phaelao ledako. Me̠nkhan okare̠ noko Ho̠ṛ ho̠po̠n okare̠ cas abadko e̠ho̠ṕ keda o̠nḍe̠ge jumidar, mahajo̠n, deko pusi ar Iṅgrạj koaḱ me̠t́ lagaoe̠n takoa. Arhõ̠ Ho̠ṛ koaḱ pho̠so̠l ko kombroe̠t́kan tahẽna. Jumidar ar mahajo̠nko do̠ Ho̠ṛ ho̠po̠n ar eṭaḱ ạdibạsi kạuḍi paesa pańca lạgit́ ạḍi ḍher sudko hataoe̠t́kan tahẽna. Noṅka hõ̠ ńe̠lo̠ḱkan tahẽna je, mit́ dho̠m dhar se̠ pańca kạuḍim hatao lekan ona do̠ tishõ̠ baṅ e̠m purạoḱkan tahẽna. Piṛhi ke̠ piṛhi noa pańca kạuḍi tahẽnkan tahẽna. Ayo, era, kuṛiko nokoaḱ laloc kho̠n bako bańcaokkan tahẽna. Arhõ̠ jahan jinis kiriń ạkhriń jo̠khe̠n so̠ṅ reaḱ palla bar lekan tahẽkana. Mit́ṭe̠n do̠ ‘Kenaram’ ar e̠ṭaḱaḱ do̠ ‘becaram’. Noa bar lekanaḱ dhaṛapallate̠ ho̠ṛ kiriń se̠ ạkhriń jo̠khe̠nko e̠ṛe̠ ocoḱkan tahẽna. Ona são briṭish koaḱ ko̠clo̠n, he̠no̠sta, santhaoma tahẽ kange. Noa kho̠n bańcao lạgit́ Sido̠ Kạnhu ho̠te̠te̠ Hul e̠ho̠ṕlena. Ona reaḱ maraṅ utạr kukmu do̠ tahẽkana apnaraḱ rajo̠sṭi benao rakaṕ okare̠ Ho̠ṛ ho̠po̠n apnar teko rajo̠ḱa. Arhõ̠ ko goṭa keda teheń kho̠n o̠ko̠e hõ̠ khajna bako e̠ma. O̠koe̠ tinạḱ hạbiće̠ si daṛe̠aḱ unạḱge uniaḱ khe̠t baṛge hoyoḱtaea. Onka lekate̠ 1855 serma reaḱ 30 jun mãhãre̠ Sido̠ Kạnhu são turue go̠ṭe̠n misra boehako mit́ṭe̠n dhạrwaḱko ho̠ho̠ keda. Onka leka e̠nhiloḱ Bho̠gnaḍire̠ Ho̠ṛ Ho̠po̠n são eṭaḱ adibạsi ar re̠ṅge̠c o̠re̠ć deko pusi hõ̠ko jarwaena. Katha tahẽkana o̠nḍe̠ kho̠n kolkate̠ niạm leka disạm goṅke ṭhe̠n ardas ar neho̠r jimạ lạgit́. Me̠nkhan ulṭạ Mo̠he̠slal do̠ro̠ga ar sãote̠ camca o̠ko̠e briṭish so̠rkaraḱ kạmireko tahẽkan onko do̠ Sido̠ Kạnhu tako kabhar lạgit́ ko kurumuṭu keda. Onde̠ge raṅgaote̠ jarwa akan Ho̠ṛko do̠ uni do̠ro̠ga ko samaḱ go̠ć kedea. São sãote̠ goṭa andoṛ rakaṕena Hul Hul Hul. Pạhil se̠ć Ho̠r ho̠po̠nko goṭa aḍe̠ pase̠ko do̠kho̠l keda. Briṭish so̠rkarre̠n ho̠ṛ hõ̠ko go̠ćena. Ado̠ noako jạr do̠ jo̠to̠ ho̠ṛge tho̠ṛa thuṛibon baḍaegea.
Netar rạskạ reaḱ katha do̠ noage jē̠, Santal Hul goṭa disạmrege manaoḱ kana. Abo Ho̠ṛ Ho̠po̠n chaḍa, eṭaḱ adibạsi, deko pusi hõ̠ ko manaoeda. Me̠nkhan noa mãhã manao reaḱ jahan hudis, ganḍo̠n se̠ mo̠nbhạsi menaḱ tabona se̠ baṅ? Baṅ do̠ e̠ke̠n e̠ne̠ć sereń ro̠ṛ landa, ja uḍić galamarao rege cabaḱ nagam reaḱ noa ạḍi maraṅ mãhã do̠? Santal Hul reaḱ ce̠t́ jo̠ste̠t́ hoe bo̠te̠ć koḱa noa jugre̠? Sido̠ Kạnhu takoaḱ kukmu hora pańjae lạgit́ aboaḱ jahan sapṛao se̠ kukmu menaḱ tabona se̠ bạnuḱ tabona? Dela thoṛagan bon ganḍo̠n bhạbit le̠nge. Santal Hul do̠ ne̠betar nanan parkan kho̠d, bakhẽṛ ar hudiste̠ manao hoyoḱ tabona. Maraṅre̠ jạruṛ kana aboaḱ lelha te̠t́ ar oka e̠pe̠rhe̠nḍe̠ menak tabon ona birudre̠ hul rakab hoyoḱ tabona. Abon ḍher Ho̠ṛge o̠lo̠ḱ paṛhao babon baḍaea, cetan se̠ (higher education) ekalte̠ lekha sumun geabon. Gidrạ pidrạko iskul, ko̠le̠j, Bharsiṭite̠ kol hoyoḱ tabona. Aboaḱ somajre̠ okako e̠pe̠rhe̠nḍe̠ (prejudice, be̠ṛbaḱ hudis) menaḱ tabon, ona dea gidie hoyoḱ tabona. Noako bon purạu lekhan Hul manao sạriago̠ḱa.
Rajạri (politics) bakhra abo Ho̠ṛ do̠ jo̠to̠ kho̠n bon lelha, boka, kuṅkigea. Disạm se̠ dhạrti ce̠t́ leka calaḱ kana ona bakhra ḍher ho̠ṛge babon baḍaea. Pase̠ć dhạrti do̠ e̠ke̠n Cando boṅgawaḱ kukmu ar hudistege calaḱ kana. Noage ḍher ho̠ṛkoaḱ hudis do̠. Bicko̠m noa ganḍo̠n do̠ bhulgea. Onate̠ abo do̠ aso̠kaete̠ juạn koṛa kuṛi rajạri bakhra so̠nto̠ro̠ḱ hoyok tabona. Abo mudre̠ rajghạriạ (politician) benaoko jạruṛ tabona. Je̠mo̠n noko rajghạriạge aboko kukmu, cetan se̠ć mo̠ho̠nḍak lạgit́te̠ ḍaharko uduḱ abon. Apnaraḱ se̠ jo̠to̠ adibạsi sãote̠ Banadhao (organization) benao hoyoḱ tabona. Union Porishod, Upojila Porishod, Jila Porisod kore̠ abore̠n Ho̠ṛ member, chairman, se̠ eṭaḱko jitạu ocoko jạruṛa. So̠rkar ṭhe̠n kho̠n e̠kalte̠ mit́ṭe̠n gan soṅsod ṭhạ̃i ńam lạgit́ ardas hoyoḱ tabona je̠mo̠n MP hõ̠ Ho̠ṛ ho̠po̠ne̠ hoe daṛeaḱ.
Santali Ạricạli bakhra hõ̠ kajakte̠ bhạbido̠ḱ hoyoḱ tabona. Ne̠betar ko̠re̠n kuṛi koṛa Hoṛte̠ ro̠ṛ landa, e̠ne̠ć sereń bako kusiḱa. Noa ghańje̠ṛ hudis usạrate̠ cabae hoyoḱ tabona. Santali ro̠ṛ-landa, o̠no̠l, sãohẽt́, gam, kạhni, o̠no̠ṛhẽ, cinema, film, naṭo̠k ko benao lạgit́ kurumuṭu e̠ho̠ṕ hoyoḱ tabona. Tinạḱ din aboaḱ sãohẽt́ baṅ tahẽn tabona unạḱ din jạt lekate̠ aboaḱ man mano̠t baṅ ḍheroḱ tabona. Nukri lạgit́ So̠rkari, ko̠mpạni, NGO, Corporate kore̠ ḍher kaete̠ Ho̠ṛ juạn bo̠lo̠ḱ hoyoḱ tabona. Bạnij be̠pari do̠ e̠kalte̠ abo somajre̠ bạnuḱkoa. Abo do̠ e̠ke̠n kiriń jo̠m jạt kana bon. Onate̠ aboaḱ kạuḍi, dho̠n ko bạnuḱ tabona. Kạuḍi ạri (economy) ke̠ṭe̠ć lạgit́ abo mudre̠ bạnij be̠pari tear lạgit́ juạnko udgạu emako jạruṛa. Ado̠m kicrić dokan, o̠ko̠e do̠ jel hako dokan, e̠ṭaḱko Hoṛo caole, pẽaj rạsun, anaj dokanko cạluia. Arhõ̠ o̠lo̠ḱ paṛhao baḍae juạn ko ko̠mpiuṭar, software, hardware, mobile, television, fridge dokan ko cạluia.
Atore̠n o̠ko̠e ho̠ṛkoak aema khe̠t baṛge menaḱa onko ul, licu, kanṭhaṛ se̠ jo̠ dare reaḱ bagwanko teara. Ado̠mko gại ḍaṅgra, me̠ro̠m, bhiḍi, ge̠ḍe̠, sim, sãk, parwa, kaḍa ạsul kate̠ akoaḱ gharo̠ńj reaḱ ṭonṭa ko cabae takoa. Ar ghãs ạsul kate̠ć hõ̠e kisạ̃ṛ daṛe̠aḱa. Ado̠m ko do̠ oṛaḱ samaṅ se̠ baṛge kore̠ mungạ, beṅgaṛ, pipạ, mạric, sạpṛi, ho̠to̠t́, purại, konhḍa, malhan ro̠ho̠e kate̠ gharo̠ńj reaḱ nacarte̠t́ko caba daṛe̠aḱa. O̠ko̠e kuṛi koṛa thoṛa paṛhao kate̠ o̠lo̠ḱ paṛhaoko bạgike̠t́, onko do̠ technical skill je̠mo̠n mo̠ṭo̠r saikēl ṭhik, mobail ṭhik, phrij ṭhik, oṛaḱre̠ ile̠kṭạri lain ṭhik, shallo, pawar tilar ṭhik, saikēl ṭhik kate̠ aema kạmiko cet́ daṛe̠ak ar nagrahare̠ kạmiko e̠ho̠ṕ daṛe̠aḱa. Noa jug do̠ko metaḱ kana information technology reaḱ o̠kte̠. O̠ko̠e ṭhe̠n technology, information menaḱa ar ona beste̠ kạmire̠i purạu daṛe̠aḱa unigeye̠ kisạ̃ṛo̠ḱa ar napaete̠ dhạrti purire̠ jingie khemao daṛe̠aḱa. Abo ho̠ṛ ho̠po̠n nahaḱ jug reaḱ jo̠to̠ leka bhordan hatao lagao hoyoḱ tabona. Outsourcing kạmi cet́ jạruṛa, software benao, graphics design, website tear, program development, dhạrti reaḱ nanan parkan puthi paṛhao jạruṛ tabona. Photography, journalist, o̠no̠lia hõ̠ hoyoḱ tabona. E̠ke̠n kisạn pạṭ kạmi kate̠ do̠ tishõ̠ babon laha daṛe̠aḱa.
Ato ṭola kore̠ pạurạ do̠ho̠ bo̠ndo̠e hoyoḱ tabona. Pạurạ ńu bạgie jạruṛ tabona cedaḱ je̠ noa do̠ aboaḱ ạricạli baṅ kana. Hạnḍi tahẽ daṛe̠aḱa bapla bihạ se̠ bhanḍan ar emanteaḱ po̠ro̠b kore̠. Ar niạm hõ̠ benao jạruṛa jē 20 serma laha gidrạko hạnḍi babon emakoa. Aboaḱ Mạńjhi porishod ar pargana porishod ke̠te̠ć hoyoḱ tabona. Dēsh mạńjhi ar lo̠ bir bạisi hõ daṛe̠aḱ khan bon ruạṛ ạgui ma. Ḳhe̠t hasa jumi jaga reaḱ hạṭiń hõ̠ ayo/ maejiu ko cekate̠ bon em daṛe̠ kekoa, noa bakhra hõ̠ thoṛa ganḍo̠n jạruṛ tabona. O̠ko̠eko lahawan jingi ḍaharre̠ menaḱko onko hõ̠ latar se̠ć koyoḱ ruạṛ hoyoḱ takoa je̠mo̠n taeno̠mre̠ menaḱko Ho̠ṛ ho̠po̠n so̠lha, ḍahar uduḱ se̠ go̠ṛo̠ e̠m lạgit́ mo̠nsubhạ tear jạruṛ takoa. Serma ke̠ serma goṭa disạm jē leka e̠ne̠ć sereń hoyoḱ kana ar bo̠l gateko ho̠ho̠eda noa bakhra hõ̠ mit́ṭe̠n niạmre̠ hijuḱ jạruṛ tabona. Cedaḱ noa ạḍi ḍher bo̠l gateḱ ar e̠ne̠ć seren akhṛa hõ somaj lạgit́ bạṛićaḱ jo̠ gei ạguieda. Abore̠n gidrạko je̠mo̠n bhage sikhnạt ṭhaona (educational institute) reko bo̠lo̠ḱ daṛe̠aḱ ona lạgit́ jao sermage mit́, bar se̠ pe̠ do̠mgan o̠lo̠ḱ paṛhao kuṛi koṛa lạgit́ udgạu dupuṛuṕ ho̠ho̠ jạruṛa. Ona dupuṛuṕ/hēlmēlre̠ se̠le̠t́ akan rạsiạko nanan parkan so̠lha se̠ lahantiḱ reaḱ taṛam ḍaharko sendra ńamkea. Onka lekage disạm barhe scholarship ńam lạgit́ sikhnạt hiri se̠ udga̠u emako jạruṛ tabona. Teheń je̠leka eṭak jạtko laha calaḱ kana, onka judi abo Ho̠ṛ Ho̠po̠n samaṅ se̠ć mit́ jo̠mo̠kte̠ babon taṛam daṛe̠aḱ khan to̠be̠ dhạrti purire̠ eṭaḱ jạtko abo jaejug geko nisṛạu, ko̠clo̠n, santhao ar he̠no̠sta bonako. Santal Hul manao reaḱ bhe̠d do̠ unrege purạo̠ḱ tabona tinre̠ abo ho̠ṛ ho̠po̠n re̠ṅge̠ć haro̠n kho̠n bon begar hạṭińo̠ḱa. Jumi jaga, kạuḍi, ạkil, bạnij be̠par, ạricạli, o̠lo̠ḱ paṛhao, sãohẽt́, rajạri ar banaodhao (organization) lekate̠bon kisạ̃ṛo̠ḱa. Noage Sido̠ kạnhu takoaḱ sạri kukmu do̠. Abo Santal jo̠to̠ lekate̠ so̠ro̠s jạt bon benao̠ḱa. Ona lạgit́ aboaḱ e̠pe̠rhe̠nḍe̠ bạgi kate̠ murukte̠ ạkil khemao, invention, kukmu pańja, mit́ jo̠mo̠kte̠ dhạrti reaḱ rạskạ bon hame̠ṭ daṛe̠aḱ. Darae kan din kore̠ aboaḱ duk ko̠sṭo̠ cabak tabonma noa ko̠ejo̠ṅ cando ṭhe̠niń so̠do̠reda. Aboren Mãyãm Gohako, hapṛam kobon disạ koma ar onkoaḱ ḍaharte̠ mo̠ńjte̠bon calao daṛe̠ḱma. Jo̠to̠ koge Santal Hul 2018 bakhra mao̠t ar dulạṛ johar. Darae kan din kore̠ Ho̠ṛ Ho̠po̠n são jo̠to̠ ạdibạsiko suluk nirại ar kusi rạskạte̠ dinko paro̠m ma. Abo cetan kho̠n Sanam duk ko̠sṭo̠, he̠no̠sta, haro̠n, ṭoṇṭa ar ko̠clo̠n, Santao cabaḱ tabon ma. Johar.

Leave A Reply